गाउँ सहर

एनआरएनएको निर्वाचन प्रकृया रोक्न परराष्ट्र मन्त्रालयले लेख्याे पत्र

• गाउँ सहर संवाददाता
• २८ भदौ सोमबार, २०७८ | ०९:१६:०० मा प्रकाशित

काठमाडौं ।  परराष्ट्र मन्त्रालयले गैरआवासीय नेपाली संघ (एनआरएनए) अन्तर्राष्ट्रिय समन्वय परिषद् तथा राष्ट्रिय समन्वय परिषद्का निर्वाचन प्रक्रिया स्थगित गर्न निर्देशन दिएको छ । परराष्ट्रले विभिन्‍न देशमा समस्या रहेको भन्‍दै निर्वाचन प्रक्रिया स्थगित गर्न निर्देशन दिएको हो ।

एनआरएनएको आगामी महाधिवेशनमा भाग लिने प्रतिनिधिहरू विधान विपरित सिफारिस गरेकाले महाधिवेशनको काम अगाडी नबढाउन निवेदन परेको परराष्ट्रले जनाएको छ ।

परराष्ट्रका अनुसार उक्त निवेदनमा राष्ट्रिय समन्वय परिषद्‌को प्रतिनिधि छनौट प्रक्रियामा अस्ट्रेलिया, जर्मनी, अमेरिका, न्यूजिल्याण्ड, बेल्‍जियम, साइप्रस, अस्ट्रिया, बेलायत, चेक गणतन्त्र, स्वीजरल्याण्ड, स्वीडेन, नेदरल्याण्ड, डेनमार्क, पोर्चुगललगायत मुलुकहरूमा समस्या रहेको पत्रमा उल्‍लेख छ ।

त्यस्तै जापानको राष्ट्रिय समन्वय परिषद्‌को निर्वाचनका सम्‍बन्धमा उठेका विषयबारेमा सम्‍बोधन नगरिएको पत्रमा लेखिएको छ ।

अध्यक्षका प्रत्यासी आचार्य समूह निकट आईसीसी पूर्वसचिव जानकी गुरुङ (बेल्जियम), एनआरएनए अमेरीकाका सल्लाहकार वेदप्रसाद खरेल र आईसीसी मानार्थ सदस्य नवराज ओली(कतार)ले परराष्ट्र मन्त्रालयमा निवेदन बुझाएका थिए ।

परराष्ट्रको पछिल्लो निर्देशनसँगै संघको आगामी अक्टोबर २३, २४ र २५ मा हुने १० औं महाधिवेशन अन्यौल परेको छ ।