स्वास्थ्य

कोरोनाबाट थप २१ जना संक्रमितको मृत्यु, नयाँ थपिए १ हजार ६७७, निको भए २ हजार ७२

काठमाडौँ । नेपालमा कोरोनाबाट पछिल्लो २४ घण्टामा थप २१ जना संक्रमितको मृत्यु भएको छ । योसहित अहिलेसम्म कोरोनाबाट मृत्यु हुनेको संख्या १० हजार ८७९ पुगेको छ ।

पछिल्लो २४ घण्टामा १५ हजार ३४ को परीक्षण हुँदा १ हजार ६७७ संक्रमित थपिएका छन् ।

आजसम्म जम्मा ३९ लाख ८० हजार ८३२ को पिसिआर र ४ लाख ९६ हजार ३७ जनाको एन्टिजेन परीक्षण भएको छ । जसबाट ७ लाख ७२ हजार १८२ पिसिआरबाट र ८५ हजार ७१३ एन्टिजेन विधिबाट संक्रमित पहिचान भएका छन् ।

अहिलेसम्मका संक्रमितमध्ये ५१४ सघन र १५४ जनाको भेन्टिलेटरमा उपचार भइरहेको मन्त्रालयले जनाएको छ ।

मन्त्रालयका अनुसार निको हुनेको संख्या गत २४ घण्टामा २ हजार ७२ छ । प्रतिशतमा हेर्दा यो ९४.७ हो । योसहित कुल निको हुनेको संख्या ७ लाख ३१ हजार पुगेको छ ।

देशभरका क्वारेन्टाइनमा रहनेको संख्या २५८ र होम आइसोलेशनमा रहेको संख्या २८ हजार ३१४ छ भने संस्थागत आइसोलेशनमा रहेको संख्या १ हजार ९८९ छ ।

देशमा सक्रिय संक्रमितको संख्या ३० हजार ३०३ रहेको छ ।

मन्त्रालयका अनुसार १७ जिल्लाहरुमा ५०० भन्दा बढी सक्रिय संक्रमित रहेका छन् भने २०० संक्रमित माथि रहेको जिल्ला २१ छ ।

अहिलेसम्म पूर्ण खोप प्राप्त गर्नेको संख्या ५० लाख १२ हजार ८२१ पुगेको मन्त्रालयले जनाएको छ ।

उमेर समूहको आधारमा अझैपनि २१ देखि ६० वर्ष उमेर समूहमा संक्रमण बढी छ ।

मन्त्रालयका अनुसार संक्रमण दर १९.५ प्रतिशत र मृत्यु प्रति दश लाखमा ३६६.७ रहेको छ ।

गाउँ सहर संवाददाता