गाउँ सहर

वाग्मती प्रदेश प्रमुख : ओलीले अनुराधा काेइराला, देउवाले विष्णु प्रसाईं हटाए, अब बन्ने शर्मा काे हुन् ?

• गाउँ सहर संवाददाता
• ३ भदौ बिहीबार, २०७८ | १९:४१:०० मा प्रकाशित

काठमाडौं । सरकारले वाग्मती प्रदेश प्रमुखलाई हटाएकाे छ । हाल रहेका विष्णु प्रसाईं हटाएर देउवा सरकारले यादवचन्द्र शर्मालाई नियुक्तिका लागि सिफारिस गरेको छ ।

मन्त्रिपरिषद्को बिहीबारको बैठकले संखुवासभाका शर्मालाई प्रदेश प्रमुखमा नियुक्तिका लागि राष्ट्रपति समक्ष सिफारिस गरेको हो । राष्ट्रपतिले नियुक्त गरेर शपथ ग्रहण भएसँगै शर्माले वागमती प्रदेश प्रमुखको कार्यभार सम्हाल्ने छन् ।

वाग्मती प्रदेशमा सरकार परिवर्तन भएसँगै सरकारले प्रदेश प्रमुख फेर्न लागेको हो । 

शर्मा प्रस्तावित नेकपा (एमाले-समाजवादी) का अध्यक्ष माधवकुमार नेपाल निकट हुन् । उनले लामो समय नेता नेपालको स्वकीय सचिव रहेर काम गरेका थिए ।

शर्मा वाग्मती प्रदेशका तेस्रा प्रमुख हुनेछन् । ओली सरकारले अनुराधा कोइरालालाई हटाएर विष्णु प्रसाईं नियुक्त गरेकाे थियाे ।

नेपालले एमाले विभाजन गर्दै एमाले समाजवादी पार्टी दर्ताको लागि निवेदन दिएको भोलिपल्टै प्रधानमन्त्री देउवाले उनलाई पनि भागबण्डा सुरु गरेका छन् ।