स्वास्थ्य

बागमतीमा थपिए एकैदिन १ हजार ३६ संक्रमित, जाेखिम बढ्याे

• गाउँ सहर संवाददाता
• ७ श्रावण बिहीबार, २०७८ | १७:०३:०० मा प्रकाशित

काठमाडाैँ । नेपालमा कोरोनाबाट पछिल्लो २४ घण्टामा २४ जनाको मृत्यु भएको छ । पछिल्लो २४ घण्टामा १२ हजार ८२९ को परीक्षण हुँदा २ हजार ७१४ संक्रमित थपिएका छन् । योसहित कुल संक्रमितको संख्या पिसिआरबाट ६ लाख ७४ हजार ७२६ र एन्टिजेन विधिबाट ५२ हजार ४४३ पुगेको छ ।

बागमती प्रदेशमा मात्र पछिल्लाे २४ घण्टामा ६१ अस्पतालहरूमा ५ हजार ९९३ काे परीक्षण गर्दा १ हजार ३६ संक्रमित थपिएका छन् ।

उता पछिल्लो समय कोरोना संक्रमण सोचेजस्तो नघटेको स्वास्थ्य तथा जनसंख्या मन्त्रालयले बताएको छ । उसले विज्ञप्ति जारी गरी पछिल्लो हप्तामा संक्रमणको दर बढेको बताएको हो । उसले लुकिछिपी मापदण्डको पालना नगरेको पाइएको बताएको छ । 

मन्त्रालयका अनुसार अहिले ५०० भन्दा बढी संक्रमित रहेका जिल्लाहरुमा मोरङ, सुनसरी, झापा, काठमाडौँ, भक्तपुर, ललितपुर चितवन, कास्की, रुपन्देही र कैलाली रहेका छन् भने २०० माथि संक्रमित रहेका २६ जिल्लाहरु छन् ।

संक्रमणको जोखिम बढिरहेको समयमा झनै सम्बेदनशील रहनुपर्ने र जनस्वास्थ्यका मापदण्ड पालना गर्न मन्त्रालयले अनुरोध गरेको छ ।