स्वास्थ्य

कोरोना २४ घण्टाः ७ हजार ६६० नयाँ संक्रमित थपिए, ३०-३९ उमेर समूह जोखिममा, ६१६ आइसियू र १७९ को भेन्टिलेटरमा उपचार हुँदै

• गाउँ सहर संवाददाता
• २१ बैशाख मंगलबार, २०७८ | १७:३४:०० मा प्रकाशित

काठमाडाैँ । कोरोनाभाइरसका कारण नेपालमा पछिल्लो २४ घण्टामा हालसम्मकै उच्च ५५ जनाको मृत्यु भएको छ । योसहित कुल मृतकको संख्या ३ हजार ४१७ पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा पिसिआर जाँचबाट ७ हजार ५८७ नयाँ संक्रमित थपिएका छन् भने एन्टिजेन विधिबाट ७३ । दुबै गरेर ७ हजार ६६० नयाँ संक्रमित थपिएका हुन् । पछिल्लाे २४ घण्टामा १६ हजार ७२० जनाकाे परीक्षण भएकाे थियाे । योसहित कुल संक्रमितको संख्या ३ लाख ५१ हजार ५ पुगेको छ । 

मन्त्रालयका अनुसार अहिले देशभरमा ५९ हजार ७८९ सक्रिय संक्रमित रहेका छन् । आज २५३ जना क्वारेन्टाइनमा रहेको उसले बताएको छ । मन्त्रालयका अनुसार आजसम्म २५ लाख ३७ हजार २९५ जनाको पिसिआर टेस्ट भइसकेको छ ।

मन्त्रालयका अनुसार अहिले देशभरका अस्पतालहरूमा ६१६ आइसियू र १७९ को भेन्टिलेटरमा उपचार भइरहेकाे छ । यसमा काठमाडाैँमा मात्र १ हजार २ सय १७ आइसाेलेशनमा, १९४ आइसियू र ७७ जना भेन्टिलेटरमा छन् ।  देशमा १ हजार ४०६ आइसियू र ५७२ भेन्टिलेटर छन् । 

उसका अनुसार ३०-३९ वर्ष उमेर समूहका नयाँ १ हजार ९७४ संक्रमित थपिएका छन् जुन अन्य उमेर समूहभन्दा उच्च हाे ।