स्वास्थ्य

कोरोनाबाट थप २७ जनाको मृत्यु, थपिए नयाँ ७ हजार २११ संक्रमित, देशभर ४८ हजार ४११ सक्रिय संक्रमित

• गाउँ सहर संवाददाता
• १९ बैशाख आइतबार, २०७८ | १६:४०:०० मा प्रकाशित

काठमाडौँ । कोरोनाभाइरसका कारण नेपालमा पछिल्लो २४ घण्टामा २७ जनाको मृत्यु भएको छ । योसहित कुल मृतकको संख्या ३ हजार ३२५ पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा पिसिआर जाँचबाट ७ हजार १३७ नयाँ संक्रमित थपिएका छन् भने ७४ जना एन्टिजेन विधिबाट पुष्टि भएका छन् । दुबै विधिबाट १६ हजार ७७० परीक्षण गरिएकोमा कुल ७ हजार २११ नयाँ संक्रमित थपिएका छन् । 

काठमाडौँमा २ हजार ७४४, ललितपुरमा ५६० र भक्तपुरमा मात्र ३०१ नयाँ संक्रमित थपिएको मन्त्रालयले बताएको छ ।

देशमा अहिले कुल संक्रमितको संख्या ३ लाख ३६ हजार ३० पुगेको छ । 

पछिल्लो २४ घण्टामा १ हजार ६१२ जना निको भएका छन् । योसहित कुल डिस्चार्ज हुनेको संख्या २ लाख ८३ हजार ९९४ पुगेको छ । 

मन्त्रालयका अनुसार अहिले देशभरमा ४८ हजार ४११ सक्रिय संक्रमित रहेका छन् । आज ६७ जना क्वारेन्टाइनमा रहेको उसले बताएको छ ।

मन्त्रालयका अनुसार आजसम्म २५ लाख ४ हजार ४७६ जनाको पिसिआर परीक्षण भइसकेको छ ।

मन्त्रालयका अनुसार देशभरका अस्पतालहरुमा ४७७ को आइसियूमा र १३१ को भेन्टिलेटरमा उपचार भइरहेको छ । काठमाडौँका अस्पतालहरुमा मात्र १ हजार ९४ जना आइसोलेशनमा, यस्तै १६० जना आइसियूमा र ५२ जनाको भेन्टिलेटरमा उपचार भइरहेको छ । 

पछिल्लो समय कोरोना कहर बढ्दै जाँदा कोरोनाको चेन ब्रेक गर्न काठमाडौँलगायतका विभिन्न स्थानहरुमा निषेधाज्ञा जारी गरिएको छ ।

पछिल्लाे २४ घण्टाको तथ्याँकले पनि २० वर्षदेखि २९ र ३० देखि ३९ वर्ष समूहमा सबैभन्दा बढी संक्रमण देखिएको छ ।