अर्थतन्त्र

उँभाे-उँभाे : निषेधाज्ञामा पनि सेयर बजार बन्द नहुने भएपछि हरियाली

• गाउँ सहर संवाददाता
• १४ बैशाख मंगलबार, २०७८ | १५:३१:०० मा प्रकाशित

काठमाडाैं । मंगलबार नेप्से परिसूचक ९२.४६ अंकले बढेर २५९९.०८ अंकमा बन्द भएको छ ।

साताको तेस्रो कारोबार दिन नेप्सेमा ९२ अंकको उछाल देखिएको हाे । गत सात कारोबार दिनमा २३० अंकले घटेको नेप्से सूचक मंगलबार एकैदिन साढे ३ प्रतिशत भन्दा धेरैले बढेको हो ।

कोरोना महामारीका कारण हकस्पट बनेका मुलुकका विभिन्न क्षेत्रमा निषेधाज्ञा जारी हुँदा त्यसको सकारात्मक प्रभाव सेयर बजारमा देखिएको छ । निषेधाज्ञामा पनि सेयर बजार बन्द नहुने भएपछि लगानीकर्ताहरुको आकर्षण सेयर बजारमा देखिएको छ ।

यस दिन ९२.४६ अंकले बढेर २५९९.०८ विन्दुमा पुगेको छ भने सेन्सेटिभ सूचक पनि १४.४८ अंकले बढेर ४६७ विन्दुमा पुगेको छ ।

यो दिन २०१ वटा कम्पनीको सेयर मूल्य बढ्दा १० वटा कम्पनीको सेयर मूल्य घटेको छ भने ४ वटा कम्पनीको सेयर मूल्यस्थिर छ ।

कारोबार रकम भने अघिल्लाे दिनको तुलनामा केहि कम देखिएको छ । अघिल्लो दिन सोमबार ६ अर्ब माथिको शेयर कारोबार भएकोमा मंगलबार ५ अर्ब १० करोड रुपैयाँ बराबरको शेयर कारोबार भएको छ । 

आज सबैभन्दा बढी कमाउने कम्पनीमा माथिल्लो तामाकोसी, विशाल बजार कम्पनी, महिला लघुवित्त वित्तीय संस्था, युनाइटेड इन्स्योरेन्स, समिट लघुवित्तलगायत छन् । 

 

त्यसैगरी सबैभन्दा बढी गुमाउने कम्पनीमा आइसीएफसी फाइनान्स डिबेञ्चर, ग्लोवल आइएमई, एसबीएल डिबेञ्चर, एनआइबीएल समृद्धि फन्डलगायत छन् । 

 

कारोबार रकमका आधारमा सबैभन्दा बढी माथिल्लो तामाकोसी छ भने त्यसपछि नेपाल इन्फ्रास्ट्रक्चर बैंक, नेपाल रिइन्स्योरेन्स कम्पनी, नबिल बैंक र छिमेकी लघुवित्त कम्पनी छन् ।

 

मंगलबार कारोबारमा आएका १३ वटै उपसमूहको सूचक सकारात्मक देखिएको छ। जसमा हाइड्रोपावर उपसमूहको सूचक सबैभन्दा धेरै ६.४८ प्रतिशतले बढेको छ ।