राजनीति

के प्रधानमन्त्रीमा ‘ट्राई’ मार्न खोज्दैछन् देउवा ?

• गाउँ सहर संवाददाता
• २७ चैत शुक्रबार, २०७७ | ०८:०४:०० मा प्रकाशित

काठमाडौं । नेपाली कांग्रेसका सभापति शेरबहादुर देउवाले आज (बुधबार) तीन दलको बैठक बोलाएका छन् । सत्तासमीकरण तथा नयाँ राजनीतिक परिदृश्यबारे छलफल गर्न नेपाली कांग्रेस, माओवादी केन्द्र तथा जनता समाजवादी पार्टी (जसपा)को संयुक्त बैठक बस्दै छ । बैठकमा देउवाले आफ्नो नेतृत्वमा नयाँ सरकार गठनबारे माओवादी केन्द्र र जसपाको आधिकारिक धारणा माग्नेछन् कांग्रेस स्राेतले जनाएकाे छ ।

माओवादी केन्द्र कांग्रेसको नेतृत्वमा सरकार गठन गर्न सहमत देखिएको छ भने जसपा विभाजित छ । संघीय परिषदका अध्यक्ष डा. बाबुराम भट्टराई र अध्यक्ष उपेन्द्र यादव पक्ष प्रधानमन्त्री केपी शर्मा ओलीको विकल्प खोज्नुपर्ने मत राख्छन् भने अध्यक्ष महन्थ ठाकुर र वरिष्ठ नेता राजेन्द्र महतो पक्ष प्रधानमन्त्री ओलीसँग निरन्तर संवादमा छन् ।

उनीहरुले रेशम चौधरीलगायतका बन्दीहरुको रिहाइ, मुद्दा फिर्ता र संविधान संशोधनलाई मुद्दा बनाएका छन् । कांग्रेस नेताहरुले रेशमको रिहा बाहेकका मुद्दा सम्बोधन गर्न तयार रहेको बताएका छन् ।

नेपाली कांग्रेसको केन्द्रीय कार्यसमिति बैठकले प्रधानमन्त्री केपी शर्मा ओलीको राजीनामा माग गर्ने र आफ्नै नेतृत्वमा सरकार बनाउन अग्रसरता लिने निर्णय गरे पनि पार्टी सभापति शेरबहादुर देउवाले खासै पहल गरेका थिएनन् । पछिल्लो समय प्रधानमन्त्री केपी शर्मा ओलीको विकल्प खोज्न गम्भीर नभएको र राजनीतिक अवस्थालाई बन्दी बनाएको भनेर देउवाको आलोचना हुँदै आएको छ । 

माओवादीले ओलीलाई हटाउने वा नहटाउनेबारे प्रष्ट निर्णय दिन देउवा र महन्थ ठाकुरलाई आग्रह गरेको छ । देउवा भने ओलीको विपक्षमा संसदमा बहुमत पुग्ने ग्यारेन्टी नभएसम्म अघि बढ्न चाहेका छैनन् ।

जसपाभित्र प्रष्ट दुई धार देखिएको छ । कांग्रेसले प्रधानमन्त्री केपी शर्मा ओलीको राजिनामा मागेर नयाँ सत्ता समिकरणमा अग्रसरता लिने निर्णय गरिसकेको छ ।

केन्द्रीय समितिको शुक्रबार बस्ने बैठक स्थगित गरेका कांग्रेस सभापति शेरबहादुर देउवाले सरकार गठनका विकल्पबारे छलफल सुरु गर्न लागेका हुन् । देउवाले आफ्नै निवास बुढानिलकण्ठमा बिहीबार साँझ निकटस्थ नेताहरुसंग परामर्श गरेका थिए ।

कांग्रेस, माओवादी केन्द्र र जसपाले प्रधानमन्त्रीबाट ओली हट्नुपर्ने बताइरहे पनि कसरी हटाउने भन्नेबारे ठोस निर्णय गर्न सकेका छैनन् । अविश्वास प्रस्ताव आए फेस गर्ने र राजीनामा दिने प्रधानमन्त्री ओलीले बताइसकेका छन् । माओवादी केन्द्रका एक नेताका अनुसार छलफलले नयाँ सरकार बन्ने नबन्ने टुंगो लाग्नेछ ।