समाज

जीपले ठक्कर दिँदा दुई जनाको मृत्यु

• गाउँ सहर डेस्क
• २३ पौष बिहीबार, २०७७ | १४:५६:०० मा प्रकाशित

बुटवल । जीप दुर्घटनामा परी दुई जनाको मृत्यु  भएको छ । रुपन्देहीको रोहिणीमा भएको दुर्घटनामा परी दुई जनाको मृत्यु भएको हो ।

भैरहवा–परासी हुलाकी सडकखण्ड अन्तर्गत रोहिणी–३ रामनगरस्थित भैरहवाबाट परासीतर्फ जाँदै गरेको लु २ च २८४२ नम्बरको जीपले दुई मोटरसाइकललाई ठक्कर दिएको जिल्ला प्रहरी कार्यालय रुपन्देहीले जनाएको छ।

दुर्घटनामा लु ३७ प ६७९८ नम्बरको मोटरसाइकलमा सवार स्याङ्जा गल्याङ नगरपालिका खरीपानीका ३० वर्षीय गणेश अधिकारी र लु २१ प ७८११ नम्बरको मोटरसाईकल चालक देवदह नगरपालिका कदमीपुरका २३ वर्षीय असिम चौधरीको उपचारको क्रममा मृत्यु भएको हो।

जिल्ला प्रहरी कार्यालय रुपन्देहीका प्रवक्ता सत्यनारायण थापाले अधिकारीको भैरहवा मेडिकल कलेज र चौधरीको भीम अस्पताल भैरहवामा मृत्यु भएको जानकारी दिएका छन् ।

उक्त दुर्घटनामा घाइते भएका पश्चिम नवलपरासी सुनवलका २८ वर्षीय बिमल गैरे र देवदह कदमपुरकी २५ बर्षीय रमिता चौधरीको उपचार भइरहेको प्रहरीले बताएको छ ।

यस सम्बन्धमा थप अनुसन्धान भइरहेकाे प्रहरीले जनाएकाे छ ।