शिक्षा

स्नातक परीक्षामा ९५ प्रतिशत विद्यार्थीकाे सहभागिता 

• गाउँ सहर डेस्क
• २९ मङ्सिर सोमबार, २०७७ | ११:५८:०० मा प्रकाशित

काठमाडौँ । त्रिभुवन विश्वविद्यालयले विद्यार्थीको भौतिक उपस्थितिमा आइतबारदेखि स्नातक तहको परीक्षा सुरु गरेको छ । कोरोना भाइरसका कारण लामो समयदेखि सञ्चालन हुन नसकेको परीक्षा सुरु गरिएको हो । परीक्षामा यसपटक ९५ प्रतिशत विद्यार्थीको सहभागिता रहेको परीक्षा नियन्त्रक पुष्पराज जोशीले जानकारी दिएका छन्।

विद्यार्थीको भौतिक उपस्थितिमै राष्ट्रिय परीक्षा बोर्डले कक्षा १२ का विद्यार्थीको परीक्षा लिएको झण्डै दुई सातापछि विश्वविद्यालयले परीक्षा लिन थालेको हो । बोर्डले झण्डै चार लाख विद्यार्थीको परीक्षा मङ्सिर दोस्रो साता सकेको थियो ।

विगतका वर्षका परीक्षामा भन्दा यस पटकको परीक्षामा विद्यार्थीको उपस्थिति धेरै उत्साहजनक देखिएको उनले जानकारी दिए । त्रिविले आइतबारबाट सञ्चालन गरेको स्नातक तहको व्यवस्थापन, शिक्षाशास्त्र र विज्ञानमा ७२ हजार विद्यार्थी परीक्षामा सहभागी रहेको जनाइएको छ । काठमाडौँ उपत्यका बाहिरका धेरै परीक्षा केन्द्रमा होमसेन्टर दिइएको र विद्यार्थीले परीक्षाको तयारी समेत गर्न पाएका कारण विद्यार्थीको सहभागिता बढेको नियन्त्रक जोशीले बताएका छन् । यसपटक विश्वविद्यालयले भौतिक उपस्थितिमा परीक्षा गर्ने निर्णय गर्दै परीक्षा केन्द्र समेत बढाउने निर्णय गरेको थियो ।