गाउँ सहर

देउवा समूहको रिट दर्ता तर सुनुवाइ आज नहुने, शेखर पक्ष सर्वोच्चमा अनुपस्थित !

• गाउँ सहर संवाददाता
• ४ माघ आइतबार, २०८२ | १२:५१:०० मा प्रकाशित

काठमाडौं । नेपाली कांग्रेस शेरबहादुर देउवा समूहले पार्टीका विषयमा निर्वाचन आयोगको निर्णय उल्ट्याउन माग गर्दै आइतबार (माघ ४) सर्वोच्च अदालतमा रिट दायर गरेको छ । रिट दर्ता भइसकेको सर्वोच्च प्रशासनले जनाएको छ ।

तत्कालीन कार्यवाहक सभापति पूर्णबहादुर खड्काले रिट दर्ता गराएका हुन् । यो रिटको पेस आजैका निम्ति तोक्न देउवा समूहका कानुन व्यवसायीले आग्रह गरेका थिए । तर, सर्वोच्च प्रशासनले यस दिन सुनुवाइ सम्भव नभएको जनाएको कानुन व्यवसायीले जानकारी दिए ।

सर्वोच्च प्रशासनले रिटको पेसी यही माघ ६ गतेका निम्ति तोकेको छ । भोलि (माघ ५) सार्वजनिक बिदा छ । आयोगले पार्टीको विशेष महाधिवेशनबाट निर्वाचित सभापति गगन थापा नेतृत्वको कार्यसमितिलाई मान्यता दिएपछि देउवा समूह सर्वोच्च गएको हो ।

रिट दायर गर्ने क्रममा खड्कासँगै प्रकाशमान सिंह, विमलेन्द्र निधि, मानबहादुर विश्वकर्मा, मीन विश्वकर्मालगायत नेताहरू सर्वोच्च पुगेका थिए । सर्वोच्चको सुरक्षा व्यवस्था कडा पारिएको छ ।

कांग्रेसका तत्कालीन कार्यवाहक सभापति पूर्णबहादुर खड्काद्वारा दायर रिटमा मुख्यतः तीन माग गरिएको छ । विशेष महाधिवेशनबाट निर्वाचित कार्यसमितिलाई काम गर्न रोक लगाउन रिटमा माग गरिएको छ । विशेष महाधिवेशन अवैध भएको देउवा समूहको जिकिर छ ।

यस्तै, नवनिर्वाचित कार्यसमितिलाई आसन्न प्रतिनिधिसभा सदस्य निर्वाचनको मनोनयनपत्र दर्तामा रोक लगाउन माग गरिएको छ । निर्वाचनका निम्ति माघ ६ गते उमेदवारको मनोनयनपत्र दर्ता गर्ने आयोगको कार्यतालिका छ । विशेष महाधिवेशनबाट निर्वाचित सभापति गगन थापा नेतृत्वले पठाएका व्यक्तिहरूको मनोनयनपत्र दर्ता नगर्न रिटमा माग गरिएको हो ।

मनोनयनपत्र दर्ता गरिसकेको अवस्था भए त्यसलाई यथास्थितिमा राख्न पनि रिटमा माग गरिएको छ । रिटको पेसी माघ ६ गतेका निम्ति तोकिएको र सोही दिन मनोनयनपत्र दर्ता गरिने भएकाले यस्तो माग गरिएको हो ।

शेखर पक्ष सर्वोच्चमा अनुपस्थित !

रिट पेस गर्न कांग्रेसको संस्थापन पक्षका नेता सर्वोच्च पुगे पनि डा. शेखर कोइराला पक्षका कुनै नेता देखिएका छैनन् । 

देउवा पक्षका एक केन्द्रीय सदस्यका अनुसार रिटमा नेता कोइराला पक्षका सबैले हस्ताक्षर गरेका छन् । तर, अदालतमा भने उपस्थित नदेखिएको ती केन्द्रीय सदस्यको भनाइ छ ।