अर्थतन्त्र

साताको अन्तिम कारोबार दिन नेप्से थाेरै अंकले बढ्यो

• गाउँ सहर संवाददाता
• ११ बैशाख बिहीबार, २०८२ | १५:३९:०० मा प्रकाशित

काठमाडौं । यो साताको पहिलो दिन आइतबारदेखि लगातार चार दिन घटेको नेप्से अन्तिम कारोबार दिन २ अंक मात्र बढेको छ भने कारोबार पनि सामान्य सुधार आएको छ ।बिहीबार नेप्से परिसूचक २.०८ अंक बढेर २६५८.०२ विन्दुमा पुगेको छ । 

नेप्सेसँगै यस दिन कारोबार रकम पनि बढेको छ । बुधबार कारोबार ७ अर्ब ५७ करोड ५५ लाख रुपैयाँ बराबरको शेयर खरिदबिक्री भएकोमा बिहीबार ७ अर्ब ८७ करोड ९३ लाख ८१ हजार रुपैयाँ बराबरको शेयर खरिदबिक्री भएको छ ।

१३ उपसमूहमध्ये यस दिन ५ उपसमूहको परिसूचक बढेको छ भने ८ उपसमूहको परिसूचक घटेको छ । यस दिन लगानी उपसमूहको परिसूचक सर्वाधिक २.२९ प्रतिशत बढेको छ। त्यस्तै, यस दिन बैंकिङ, जलविद्युत, म्युचुअल फण्ड र व्यापार उपसमूहको परिसूचक सामान्य बढेको छ। यस दिन होटल तथा पर्यटन उपसमूहको परिसूचक सर्वाधिक १.१६ प्रतिशत घटेको छ ।

आज दुई कम्पनीको स्टकको शेयर सकारात्मक सर्किट लेभलमा कारोबार भएको छ । यस दिन नेपाल माइक्रो इन्स्योरेन्स कम्पनी र क्रेष्ट माइक्रो लाइफ इन्स्योरेन्सको शेयर सकारात्मक सर्किट लेभलमा कारोबार भएको हो । नेपाल हाइड्रो डेभलोपर्सको शेयरमूल्य सर्वाधिक ७.१२ प्रतिशत घटेको छ।

कारोबार रकमका आधारमा यस दिन ङादी ग्रुप पावर शीर्ष स्थानमा रहेको छ । जसको ७० करोड ३४ लाख ९५ हजार रुपैयाँ बराबरको शेयर खरिदबिक्री भएको छ ।