अर्थतन्त्र

नेप्से उकालाे : साढे ११ अर्बकाे काराेबार

• गाउँ सहर संवाददाता
• ११ फाल्गुण आइतबार, २०८१ | १५:२७:०० मा प्रकाशित

काठमाडाैँ। नेपाल स्टक एक्सचेन्ज (नेप्से) परिसूचक साताको पहिलो कारोबार दिन आइतबार बढेर बन्द भएको छ। पछिल्ला चार कारोबार दिनदेखि लगातार उकालो लाग्दै आएको नेप्सेले यो दिन पनि सोही लय कायम राखेको हो।

आइतबार नेप्से परिसूचक ११.६६ अंक बढेर २,७५५.४० विन्दुमा पुगेको छ। साथै, सेन्सेटिभ इण्डेक्स ०.६६ अंक, फ्लोट इण्डेक्स ०.५५ अंक र सेन्सेटिभ फ्लोट इण्डेक्स ०.१२ अंकले बढेका छन्।

नेप्से परिसूचकसँगै कारोबार रकम पनि उल्लेख्य रूपमा वृद्धि भएको छ। अघिल्लो कारोबार दिन बिहीबार ८ अर्ब ६२ करोड रुपैयाँको शेयर किनबेच भएको बजारमा आइतबार ३२८ कम्पनीका १ लाख ८ हजार ९१३ पटकको कारोबारमा ११ अर्ब ५४ करोड ८३ लाख ३७ हजार रुपैयाँ बराबरको २ करोड १२ लाख ६ हजार कित्ता शेयर खरिदबिक्री भएको छ।

बजारमा गार्डियन माइक्रो लाइफ इन्स्योरेन्सको शेयर सकारात्मक सर्किट लेभलमा कारोबार भएको छ। सो कम्पनीको शेयरमूल्य ७० रुपैयाँ ९० पैसा बढेर ७८० रुपैयाँ २० पैसामा अन्तिम कारोबार भएको छ। यस्तै, कुमारी सबल योजनाको इकाईमूल्य करिब १० प्रतिशतले उकालो लागेको छ भने छ्याङ्दी हाइड्रोपावरको शेयरमूल्य ८ प्रतिशतले बढेको छ। अर्कोतर्फ, रिभर फल्स पावरको शेयरमूल्य सबैभन्दा धेरै ७.२४ प्रतिशतले घटेको छ। उपकार लघुवित्त वित्तीय संस्थाको शेयरमूल्य ६.५ प्रतिशतभन्दा बढी र पिपुल्स हाइड्रोपावरको शेयरमूल्य ६ प्रतिशतले ओरालो लागेको छ।