अर्थतन्त्र

शेयरबजारमा बन्याे हालसम्मकै काराेबार रकमकाे उच्च रेकर्ड

• गाउँ सहर संवाददाता
• १६ श्रावण बुधबार, २०८१ | १५:१६:०० मा प्रकाशित

काठमाडौं । शेयर बजारमा शेयर काराेबार रकमकाे उच्च रेकर्ड बनेकाे छ। 

साताकाे चाैथाे दिन बुधबार हालसम्मकै उच्च काराेबार भएकाे छ । यस दिन कुल २१ अर्ब ९१ करोड १५ लाख रुपैयाँ बराबरको कारोबार भएको छ । यसअघि अघिल्लो बुल चरणमा ३१ साउन २०७८ मा २१ अर्ब ५३ करोड रुपैयाँ बराबरको उच्च रेकर्ड बनेको थियो ।

अघिल्लो चरणको बुलको कारोबार रेकर्ड तीन वर्षमा तोडिएको हो ।

आज नेप्से ६४.२५ अंकले बढेर दुई हजार ७ सय ६० दशमलब ९० विन्दुमा बन्द भएको छ । आज कारोबार भएका कम्पनीमध्ये १९१ वटाको बढेको छ भने ४४ वटा कम्पनीको शेयरमूल्य घटेको छ । ७ कम्पनीको शेयरमूल्य स्थिर रहेको छ ।                     

आज सिभिल बैंक डिभेञ्चर २०८८ को शेयरमूल्य ७.९२ प्रतिशतले घटेको छ । यसका साथै आज हिमालयन रि–इन्स्योरेन्स लिमिटेडको सर्वाधिक कारोबार भएको छ । यस कम्पनीको ८४ करोड ४९ लाख बराबरको कारोबार भएको छ ।