प्रेरणा

स्थानीय र समाजले गरे दुःखमा धान काटेर गरे सहयोग

• गाउँ सहर संवाददाता
• २ मङ्सिर शनिबार, २०८० | २०:४६:०० मा प्रकाशित

लेखनाथ । मानवीय पीडामा परेर दु:खमा रहेका समयमा खेतमा पहेलपुर भएर पाकेको धान थन्क्याउनका लागि पाेखरा, २६ का स्थानीयहरुले सहयोग गरी उदाहरणीय काम गरेका छन् ।

पर्वतको जलजला गाविस वडा नं ५ स्थायी  ठेगाना भएका दीपक सुवेदीका बुबा धर्मदत्त सुवेदीको निधन भएपछि  सुवेदीको दु:खमा उनीहरूले  सहयोग गरेका हुन् । सुवेदीले  पोखरा २६ को विजयपुरमा भाडामा लिएर कृषि  फर्म संचालन गर्दै आएको १३ रोपनी जग्गाको धान पाकेर  रुमलिन थालेपछि मल्लाज कालान्जर सेवा समाजको सक्रियतामा धान काट्ने  काम गरिएको हो ।

सुवेदीका बुबा धर्मदत्तको गत कार्तिक २७ गते निधन भएपछि उनी किरियामा बस्नुपर्ने भएपछि पाकेको धान थन्क्याउनका लागि समाजका कोषाध्यक्ष खेमनाथ शर्माको अग्रसरतामा समाजका २९ र स्थानीय गरी करीव ४० जनाको जनश्रमदानमा धान काटेर सहयोग गरिएको हो ।

सुवेदी परिवार काज किरियाबाट उम्कदासम्ममा खेतमा लगाएको जेठोबुढो धान पाकेर झर्ने देखिएपछि पर्वतको जलजलाबाट पोखराको बिभिन्न ठाउँमा रहेका ब्यक्तिहरुको सहभागीतामा धान काट्ने काम भएको हो भने अव बाँकी रहेको काम पनि समाजकै अग्रसरतामा गरिने समाजका अध्यक्ष नारायण प्रसाद सुवेदीेले जानकारी दिए।