खेल

विश्वकप छनोटकाे दाेस्राे खेलमा नेपालले आज मलेसियासँग खेल्दै

• गाउँ सहर संवाददाता
• १४ कार्तिक मंगलबार, २०८० | ०८:०९:०० मा प्रकाशित

काठमाडौं । घरेलु मैदानमा सोमबारदेखि सुरु भएको आईसीसी टी-२० विश्वकप एसिया छनोटअन्तर्गत समूह ‘ए’को दोस्रो खेलमा नेपालले आज मलेसियासँग खेल्दैछ ।

कीर्तिपुर क्रिकेट मैदानमा दिउँसो साढे १ बजे सुरु हुने खेलमा नेपाल लगातार दोस्रो जितको प्रयासमा हुने छ ।

यसअघि नेपालले पहिलो खेलमा सोमबार सिंगापुरलाई ८ विकेटले हराएको थियो। मलेसिया भने पहिलो खेलमा ओमानसँग ३२ रनले पराजित भएको थियो । मंगलबारको खेल जितेमा नेपाल सेमिफाइनल नजिक पुग्ने छ ।

आजै समूह ‘ए’अन्तर्गत ओमान र सिंगापुरबीच बिहान ९ बजे खेल सुरु हुनेछ । यदि ओमान र नेपाल दुवै विजयी भएमा समूहको अन्तिम खेलअघि नै सेमिफाइनलमा स्थान पक्का गर्नेछन् ।

यस्तै नेपालको नजर जितका साथै नेट रनरेटमा पनि हुनेछ । ८ टोली सहभागी छनोटमा दुवै समूहबाट शीर्ष दुई टोली सेमिफाइनल पुग्नेछन् भने सेमिफाइनल पुग्ने दुई टोली अर्को वर्ष वेष्ट इन्डिज र अमेरिकामा हुने टी-२० विश्वकपमा छनोट हुने प्रावधान छ ।

त्यसैले अहिले नेपाली टोली ९ वर्षपछि फेरि टी-२० विश्वकपमा पुग्ने एक मात्र लक्ष्यका साथ खेलिरहेको छ ।

मंगलबार कुल चार खेल हुनेछ । ओमान र सिंगापुरबीचको खेल टीयू मैदानमै बिहान ९ बजे सुरु हुनेछ । यस्तै समूह ‘बी’अन्तर्गत बहराइन र हङकङबीचको खेल मुलपानी मैदानमा बिहान ९ बजे सुरु हुनेछ । मुलपानी मैदानमै यूएई र कुवेतबीचको खेल दिउँसो सवा १ बजे सुरु हुनेछ ।

चिरपरिचित प्रतिद्वन्द्वी

पछिल्लो पटक नेपालले लगातार मलेसियालाई हराउँदै आएकोले आजको खेलमा पनि सोही लय कायम राख्दै जित निकाल्ने नेपालको योजना छ ।

तर मलेसियाविरुद्ध पछिल्लो भेटमा शतक प्रहार गर्दै अलराउण्ड प्रदर्शन गरेका दीपेन्द्र सिंह ऐरी भने आज खेल्ने छैनन् ।

नेपालका लागि मलेसिया नयाँ प्रतिद्वन्द्वी होइन । नियमित अन्तरालमा यी दुई टोलीबीच खेल हुँदै आएको छ । केही खेलमा मलेसियाले टक्कर दिए पनि नतिजामा नेपाल नै हाबी छ ।

टी-२० अन्तर्राष्ट्रियमा यी दुई टोलीबीच अहिलेसम्म ८ खेल भएकोमा नेपालले ७ खेल जितेको छ । मलेसियाले एक खेल मात्र जितेको छ ।

सन् २०२० यताको पछिल्लो पाँच टी-२० आई खेलको नतिजा हेर्दा नेपाल चार खेलमा विजयी भएको छ ।

नेपाल र मल्सियाबीच २०२१ र २०२२ मा त्रिकोणात्मक टी-२० शृङ्ला हुँदा कीर्तिपुरमा चार खेल भएको थियो र सबै खेल नेपालले जितेको थियो ।

२०२१ मा भएको त्रिकोणात्मक शृङ्लामा नेपालले मलेसियालाई ९ विकेट र ६९ रनले हराएको थियो भने २०२२ को शृङ्लामा नेपाल ६ विकेट र ८५ रनले विजयी भएको थियो ।

सन् २०२० को फेब्रुअरीमा भएको एसीसी इस्टर्न रिजन टी-२० मा मलेसियाले नेपाललाई २२ रनले हराएको थियो ।