सडक/यातायात

सडक निर्माण गर्न धेरै निकाय हुँदा समस्या, एउटै निकायबाट गर्ने विषयमा छलफल

• गाउँ सहर संवाददाता
• २४ माघ मंगलबार, २०७९ | १४:२०:०० मा प्रकाशित

काठमाडौं । उपप्रधान एवं भौतिक पूर्वाधार तथा यातायातमन्त्री नारायणकाजी श्रेष्ठले सडक निर्माण गर्न धेरै निकाय हुँदा समस्या निम्तिएको बताएका छन् ।

मंगलबार मन्त्रालयमा आयोजित पत्रकारसँगको अन्तरक्रिया कार्यक्रममा बोल्दै अब एउटै निकायले सडकको काम गर्ने तयारी गरिएको बताएका हुन् । 

“अहिले महानगर, काठमाडौं विकास प्राधिकरण तथा अन्य निकायले सडक निर्माण र विकास गर्ने भएकाले समस्या भएको छ । एउटै निकायबाट गर्नेगरी हामी छलफल गरिरहेका छौं,” उनले भने, “काम गर्ने अनेक निकाय भएकाले मन्त्रालयले गरेको प्रगति देखिएन । अन्य निकायले बाटो नबनाउदा हामीलाई गाली गर्ने गरिएको छ ।” 

त्यस्तै, भौतिक पूर्वाधारको विकासबिना आर्थिक समृद्धि नहुने मन्त्री श्रष्ठले बताए । अहिलेको सरकार जनताको आर्थिक समृद्धिलाई केन्द्रमा राखेर काम गर्ने भएकाले जसरी सहज रूपमा र छिटो तरिकाले काम हुन्छ, त्यसैलाई अवलम्बन गर्ने बताए । 

पहिलो प्राथमिकता सुशासन भएकाले त्यसैअनुसार सिस्टममा काम गर्ने उनले प्रतिबद्धता जनाए ।