गाउँ सहर

यस्ताे अवस्थामा भेटियाे हराइरहेकाे तारा एअरकाे विमान

• गाउँ सहर संवाददाता
• १६ जेठ सोमबार, २०७९ | ०७:५८:०० मा प्रकाशित

काठमाडौं । आइतबार बिहानदेखि बेपत्ता रहेको तारा एयरको जहाज दुर्घटनाग्रस्त अवस्थामा फेला परेको छ ।

नेपाली सेनाको टोलीले जहाज थसाङ २ मुस्ताङमा दुर्घटनाग्रस्त अवस्थामा फेला पारेको नेपाली सेनाका प्रवक्ताले जानकारी गराएका छन् ।

जहाज चार हजार मिटर माथि डाँडामा ठोक्किएको अनुमान गरिएको छ । थुसाङ २ का वडाध्यक्ष गौतम शेरचनले दिएको जानकारीअनुसार गाउँभन्दा निकै माथि डाँडामा जहाज ठोक्किएको पाइएको छ ।

उनैले करिब चार हजार मिटर माथि हुन सक्ने अनुमान गरिएको बताए ।

“चार हजार मिटरभन्दा माथिको उचाइमा छ,” उनले भने, “यही बाटो भएर यार्सा टिप्न जानेले जहाज दुर्घटनामा परेको देखेर खबर गरिएको हो ।”

पोखराबाट मुस्ताङका लागि उडेको  तारा एयरको ट्विनअटर विमान आइतबार बिहान १० बजेर ७ मिनेटमा सम्पर्कविहीन भएको थियो । सो विमानको खोजी कार्य सोमबार बिहानैबाट पुन: सुरु गरिएको थियो । विमानमा १९ यात्रु र चालक दलसहित २२ जना सवार थिए ।