गाउँ सहर

यस्ताे छ राप्रपा वडा अध्यक्षका उम्मेद्वार लावतीकाे चुनावी घाेषणा

• गाउँ सहर संवाददाता
• २१ बैशाख बुधबार, २०७९ | १४:१२:०० मा प्रकाशित

पाँचथर । राष्ट्रिय प्रजातन्त्र पार्टी (राप्रपा) का कुम्मायक गाउँपालिका, वडा अध्यक्ष उम्मेद्वार जगतजंग लावतीले वृद्ध भत्ता घरदैलोमा उपलब्ध गराउने, युवाले संचालन गरेको व्यवसायलाई कर छुट दिने घोषणा गरेका छन् ।

‘गाउँ समाजमा आय आर्जन र रोजगार सिर्जनालाई बल दिन, आफू निर्वाचित भएको अवस्थामा, युवाहरुले संचालन गरेको व्यवसायलाई कर छुट दिने व्यवस्था लागू गर्नेछु,’ राप्रपाका कुम्मायक गाउँपालिका, वडा अध्यक्ष १ का उम्मेद्वार जगतजंग लावतीले भने ।

ज्येष्ठ नागरिकका लागि पनि वृद्ध भत्ता सहज रुपमा वितरण गर्ने व्यवस्था मिलाउने उनले उद्घोष गरेका छन् ।

‘हालको व्यवस्था अनुरुप, ज्येष्ठ नागरिक प्रत्येक महिना गाउँपालिका केन्द्रमा आउनु पर्ने बाध्यता छ । यसकारण ज्येष्ठ नागरिकका सुविधाका निम्ति, राज्यद्वारा उपलब्ध वृद्ध भत्ता जनताको घरदैलोमै वितरण गर्ने व्यवस्था मिलाउने छु,’ उनले भने ।

राप्रपाका वडा अध्यक्ष उम्मेद्वार लावती, सुख्खाग्रस्त कुम्मायक क्षेत्रमा तमोर पम्पीङ परियोजनामार्फत पानी उपलब्ध गराउन पन्ध्र वर्ष क्रियाशील रहेका छन् । गाउँ समाजमा लोकप्रिय पूर्व डिएसपी लावती, पापोहाङ लावती सयङका पूर्व केन्द्रीय सदस्य समेत हुन् ।