गाउँ सहर

हत्या आरोपमा भण्डारीसहित चार जना पक्राउ

• गाउँ सहर संवाददाता
• २ बैशाख शुक्रबार, २०७९ | १२:३०:०० मा प्रकाशित

काठमाडाैं । प्रहरीले हत्या आरोपमा चार जनालाइ पक्राउ गरेकाे छ । कैलालीको जानकी गाउँपालिका–९ घर भएका २५ वर्षीय अर्जुन दासको हत्यामा संलग्नहरूलाई  प्रहरीले पक्राउ गरेको हाे । हत्या आरोपमा मनोज भण्डारीसहित चार जनालाई रुपन्देहीको बेलहियाबाट पक्राउ गरिएको प्रहरीले जानकारी दिएकाे छ । 

पक्राउ पर्नेमा जानकी–९ घर भएका १९ वर्षका मनोज भण्डारी, सोही ठाउँका १९ वर्षीय सुमित साउद, बम बहादुर बोहोरा उर्फ बमे र रोन परियार उर्फ दिलिप दास छन् । महाशाखाको टोलीले वैशाख १ मा उनीहरुलाई रुपन्देहीको सिद्धार्थनगर नगरपालिका वडा नम्बर–१ बेलहिया सीमा नाकाबाट पक्राउ गरेर काठमाडौंमा सार्वजनिक गरेको छ ।

टाउको काटेर छुट्याएको अवस्थामा स्थानिय अमरावती सामुदायिक बनमा पुस ३ मा अर्जुनको शव भेटिएको थियो । अर्जुन दास गाउँमै मजदुरी गर्थे । हत्यापछि उनको कपडा निकालेर सो कपडाले रुखमा बाँधेको अवस्थामा उनको शव भेटिएको थियो ।  

यस सम्बन्धमा थप अनुसन्धान भइरहेकाे प्रहरीले बताएकाे छ ।