खेल

नेपालले दियाे पीएनजीलाई २०४ रनकाे लक्ष्य

• गाउँ सहर संवाददाता
• १७ चैत बिहीबार, २०७८ | १४:०९:०० मा प्रकाशित

काठमाडौं । नेपालले त्रिकोणात्मक ट्वान्टी २० शृंखलामा पपुवा न्यु गिनी (पीएनजी) लाई २ सय ४ रनको लक्ष्य दिएको छ ।

पीएनजीले त्रिवि क्रिकेट मैदानमा बिहीबार टस जितेर फिल्डिङ गर्ने निर्णय गरेपछि ब्याटिङमा आएको नेपालले निर्धारित २० ओभरमा ६ विकेट गुमाई २ सय ३ रन बनाएको हो ।

दीपेन्द्रसिंह ऐरीको सानदार अर्धशतकमा नेपालले विशाल रन बनाएकाे छ । दीपेन्द्रले ३३ बलमा ६६ रन बनाए । उनले १८ औं ओभरमा नोर्मन भानुआलाई लगातार तीन छक्का प्रहार गर्दै आफ्नो अर्धशतक पूरा गरेका थिए । दीपेन्द्रले कुल ३ चौका र ४ छक्का प्रहार गरे ।

नेपालले १८ औं ओभरमा २४ र १९ औं ओभरमा ३२ रन जोडेको थियो । डेब्यू गरिरहेका मोहम्मद आदिल अहमदले १९ औं ओभरमा नोसाइना पोकानालाई ३ छक्का र १ चौका तथा दीपेन्द्रले १ छक्का प्रहार गरेका थिए । पोकानाले सोहि ओभरको अन्तिम बलमा दीपेन्द्रलाई क्याच आउट गराए ।

आदिलले ११ बलमा १ चौका र ३ छक्का प्रहार गर्दै ३१ रन बनाए । काबुआ मोरेआले अन्तिम ओभरमा आदिल, दीलिप नाथ (०) र करण केसी (१) लाई आउट गरे । नेपालले अन्तिम ओभरमा ४ रनमात्र बनाउन सक्यो । आरिफ शेख २ रनमा अविजित रहे ।

कुशल भुर्तेल र आसिफ शेखले ७ ओभर भित्र ४२ रन जोडेर नेपाललाई राम्रो सुरुआत दिलाएका थिए । कुशल २० बलमा १७ रन बनाई आउट भए । पछिल्ला दुई खेलमा नेपालबाट उच्च स्कोर बनाएका आसिफले २९ बलमा ४ चौका र १ छक्का प्रहार गर्दै ४१ रन बनाए । रोहित पौडेलले ४१ रन बनाए । उनले २३ बल खेली ४ चौका र २ छक्का प्रहार गरे ।

ट्वान्टी २० अन्तर्राष्ट्रियमा नेपालको यो ५० औं खेल हो । नेपालले यस खेल जितेमा राउन्ड रोबिन लिगको एक खेल अगावै फाइनल पुग्ने छ । नेपालले पहिलो खेलमा पीएनजीलाई १५ रनले र अघिल्लो दिन मलेसियालाई ६ विकेटले पराजित गरेको थियो ।