अर्थतन्त्र

उपकार लघुवित्त वित्तीय संस्थाकाे आईपीओ निष्कासन मिति ताेकियाे

काठमाडाैं । उपकार लघुवित्त वित्तीय संस्था लिमिटेडले आईपीओ निष्कासन गर्ने मिति तय गरेको छ । प्रतिशेयर १०० रुपैयाँ अंकित २ करोड ३६ लाख २५ हजार रुपैयाँ बराबरको २ लाख ३६ हजार २५० कित्ता साधारण शेयर निष्कान गर्न लागेको हो । जसमध्ये जारी पूँजीको शुन्य दशमलव ५ प्रतिशत अर्थात् ३ हजार २८१ कित्ता शेयर कर्मचारी तथा ५ प्रतिशत अर्थात ११ हजार ८१३ कित्ता शेयर सामूहिक लगानी कोषका लागि सुरक्षित गरीएको छ । बाँकी २ लाख २१ हजार १५६ कित्ता शेयर सार्वजनिक निष्कासन गरिने जनाइएकाे छ ।

उक्त शेयरमा चैत २५ गतेदेखि २९ गतेसम्म आवेदन दिन सकिनेछ । उक्त अवधिका माग अनुसार आवेदन पर्न नसके बैशाख ९ गतेसम्म समय थप गरिने छ । तर, यसअघि आईपीओमा परेको आवेदनको प्रवृत्ति हेर्दा यो आईपीओ चैत २९ गतेनै बन्द हुनेछ ।

आईपीओमा न्यूनतम १० कित्तादेखि अधिकतम १ हजार कित्तासम्म आवेदन दिन सकिने छ । आईपीओ निष्कासन तथा विक्री प्रबन्धकमा नेपाल एसबिआई मर्चेन्ट बैंकिङ लिमिटेड रहेको छ ।

नेपाल धितोपत्र बोर्डले कम्पनीलाई आईपीओ निष्कासनका लागि चैत ७ गते अनुमति दिएको थियो । कम्पनीको अधिकृत पूँजी ८ करोड रहेको छ भने जारी पूँजी ६ करोड ३६ लाख २५ हजार र चुक्तापूँजी ४ करोड २० लाख रुपैयाँ रहेको छ ।  हाल संस्थापकतर्फ ६४ प्रतिशत शेयर स्वामित्व रहेको कम्पनीले सर्वसाधारणमा ३६ प्रतिशत आईपीओ विक्री गर्न लागेको  हो । 

गाउँ सहर संवाददाता

तपाईँको मत