गाउँ सहर

श्रीमतीको हत्या गरेको आरोपमा श्रीमान पक्राउ

• गाउँ सहर संवाददाता
• ११ चैत शुक्रबार, २०७८ | १२:३५:०० मा प्रकाशित

काठमाडाैं । श्रीमतीको हत्या गरेको आरोपमा एक युवक पक्राउ परेका छन् । काठमाडौंको बुढानिलकण्ठमा श्रीमतीको हत्या गरेको आरोपमा एक युवक पक्राउ परेका हुन् । २४ वर्षीया लक्ष्मी तामाङ (थापा) को हत्या गरेको अभियोगमा बिहीबार राती बूढानीलकण्ठ नगरपालिका–१३ चुनिखेल डेरा गरी बस्ने उदयपुर कटारीका २१ वर्षीय भक्तबहादुर थापा पक्राउ गरेकाे प्रहरीले जानकारी दिएकाे छ । 

घरायसी विवादका कारण भक्तले धारिलो हतियार प्रहार गरी लक्ष्मीको हत्या गरेको प्रहरीले जनाएकाे छ । भक्तको प्रहारबाट गम्भीर घाइते भएकी लक्ष्मीलाई चुनिखेलस्थित करुणा अस्पताल पुर्याइएको थियो । अस्पताल पुर्याएलगत्तै उनको मृत्यु भएको प्रहरीको भनाई छ ।

प्रहरीका अनुसार आक्रमणलगत्तै फरार रहेका थापालाई महानगरीय प्रहरी वृत्त महाराजगंज र महानगरीय प्रहरी प्रभाग बुढानिलकण्ठबाट खटिएको प्रहरीको संयुक्त टोलीले हतियारसहित पक्राउ गरेको हो ।

घटनाका सम्बन्धमा थप अनुसन्धान भैरहेको प्रहरीले बताएको छ ।