विश्व

रुस-युक्रेन युद्ध : सेनाले गरेको गोलाबारीमा एक रुसी पत्रकारको मृत्यु

काठमाडाैं । रुस-युक्रेन युद्धमा एक जना पत्रकारकाे मृत्यु भएकाे छ । युक्रेनको राजधानी कीभमा रुसी सेनाले गरेको गोलाबारीमा एक रुसी पत्रकारको मृत्यु भएको हाे । खोजी वेबसाइट द इनसाइडरका संवाददाता ओक्साना बाउलिनाको मृत्यु भएको एजेन्सीले जनाएकाे छ । 

द इनसाइडरका लागि उनि कीभ र पश्चिमी शहर ल्भिभबाट रिपोर्ट गरिरहेकी थिइन् । कीभको पोडिल जिल्लामा रिपोर्टिंगको क्रममा रुसी रकेट आक्रमणमा उनको मृत्यु द इनसाइडरले जनाएको छ ।

बाउलिनाले यसअघि रुसी विपक्षी नेता एलेक्सी नाभाल्नीको भ्रष्टाचार विरोधी फाउन्डेसनमा काम गरेकी थिइन् र रुस छाडेकी थिइन् । गत वर्ष फाउन्डेसनलाई रुसमा गैरकानूनी र चरमपन्थी घोषणा गरेपछि यसका धेरै कर्मचारीहरू विदेश पलायन भएका थिए ।

सो आक्रमणमा अर्का एक जनाको मृत्यु भएको र दुई जना घाइते भएको इन्साइडरले जानकारी दिएको छ । बाउलिनाले पहिले कीभ र पश्चिमी युक्रेनी शहर ल्भिभबाट धेरै रिपोर्टहरू पठाएकी थिइन् ।

युक्रेनमा मार्चको सुरुमा, स्पेनिस समाचार एजेन्सी इएफओइका लागि काम गर्ने युक्रेनी टिभी च्यानल लाइभका क्यामेरा अपरेटर येभेनी साकुन, कीभमा टिभी ट्रान्समिसन टावरमा गोली प्रहार गर्दा मारिएका थिए ।

गाउँ सहर संवाददाता