गाउँ सहर

निर्माण व्यवसायी अनुप पाण्डे पक्राउ, के हाे घटना ?

• गाउँ सहर संवाददाता
• २८ फाल्गुण शनिबार, २०७८ | १५:१२:०० मा प्रकाशित

काठमाडाैं । दाङका निर्माण व्यवसायी अनुप पाण्डे काठमाडौंबाट पक्राउ परेका छन् ।

डेढ करोड रुपैयाँ ठगी गरेको आरोपमा नेपाल प्रहरीको केन्द्रीय अनुसन्धान व्यूरो (सीआईबी) को टोलीले उनलाई काठमाडौंको काँडाघारीबाट शनिबार पक्राउ गरेको हो ।

उनीविरुद्ध विभिन्न व्यक्तिले झण्डै ६ करोड ठगी गरेको भन्दै जिल्ला प्रहरी कार्यालय दाङमा जाहेरी दिएका थिए ।

पक्राउ परेका पाण्डेलाई दाङ ल्याउने तयारी भइरहेको दाङका प्रहरी प्रमुख सुरेश काफ्लेले बताए ।

घोराही उपमहानगरपालिका–१५ भरतपुरका व्यवसायी गेहेन्द्र बस्नेतले निर्माण व्यवसायी पाण्डेले आफूसँग १ करोड ४४ लाख रुपैयाँ ठगी गरेको भन्दै प्रहरीमा उजुरी दिएका थिए ।

पीडितमध्ये १६ जनाले जिल्ला प्रशासन कार्यालयमा र एक जनाले जिल्ला प्रहरी कार्यालयमा पाण्डेविरूद्ध ठगी मुद्दा दिएका छन् ।

के हाे घटना ?

पाण्डे तुलसीपुर-घोराही चार लेन सडकखण्ड निर्माणको जिम्मा लिएका ठेकेदार हुन् ।

पाण्डेविरूद्ध घोराही उपमहानगरपालिका-१५ भरतपुरका व्यवसायी तथा नेकपा एमाले जिल्ला कमिटी सदस्य गेहेन्द्र बस्नेत एक्लैले १ करोड ४४ लाख ठगी गरेको भन्दै गत माघमा जिल्ला प्रहरी कार्यालय घोराहीमा उजुरी दिएका थिए । 

आफ्ना छोराविरूद्ध उजुरी परेपछि नेकपा एमालेका केन्द्रीय सदस्य तथा तुलसीपुर उपमहानगरपालिकाका मेयर समेत रहेका घनश्याम पाण्डेले बस्नेत लगायतसँग छलफल गर्दै आएका थिए । उनले विभिन्न चरणमा छलफल गरेर विवाद साम्य पार्न खोजेपनि रकम नपाएपछि बस्नेतले अनुपले दिएको चेकको प्रमाण पनि प्रहरीलाई बुझाएका छन् । 

यसअघि उनका समाचारहरू प्रकाशित भएपछि अनुपले विज्ञप्ति जारी गर्दै आफ्नो बचाउ गरेका थिए ।