गाउँ सहर

हत्यामा संलग्न दुईजना १६ वर्षपछि प्रहरी नियन्त्रणमा

• गाउँ सहर संवाददाता
• १५ फाल्गुण आइतबार, २०७८ | १६:४६:०० मा प्रकाशित

काठमाडाैं । प्रहरीले हत्यामा संलग्न दुईजनालाई पक्राउ गरेको छ ।  बझाङको जयपृथ्वी नगरपालिका–७ का मीनबहादुर भण्डारीको हत्यामा संलग्न दुईजनालाई पक्राउ गरेको हाे । 

प्रहरीको केन्द्रीय अनुसन्धान ब्यूरो (सिआईबी) ले विसं २०६२ असोज २३ गते भण्डारीको हत्यामा संलग्न बझाङ जयपृथ्वी नगरपालिका–७ ज्वाडाका ४० वर्षीय वीरेन्द्र राना र सोही स्थानकै ३३ वर्षीय रमादेवी रानालाई शनिबार पक्राउ गरी आइतबार सार्वजनिक गरेको हो ।

हतियारको प्रयोग गरी ज्यान मारेर फरार रहेका उनीहरुलाई कञ्चनपुरको भीमदत्त नगरपालिका–११ गड्डाचौकीस्थित नेपाल–भारत सीमाबाट पक्राउ गरिएको ब्यूरोका प्रवक्ता, प्रहरी उपरीक्षक कमल थापाले जानकारी दिएका छन् । उनीहरुलाई जिल्ला अदालत बझाङले विसं २०६६ सालमा कर्तव्य ज्यान मुद्दामा वीरेन्द्रलाई २० वर्ष कैद र रमा देवीलाई तीन वर्ष कैद हुनेगरी फैसला गरेको थियो ।

पक्राउ परेका दुवैजनालाई आज फैसला कार्यान्वयनका लागि जिल्ला अदालत बझाङ पठाइएको प्रहरीले बताएकाे छ ।