अर्थतन्त्र

शेयर बजारमा उच्च अंककाे गिरावट, काराेबार रकम भने बढ्याे

• गाउँ सहर संवाददाता
• १२ फाल्गुण बिहीबार, २०७८ | १५:२४:०० मा प्रकाशित

काठमाडाैं । शेयर बजारमा साताको कारोबारको अन्तिम दिन बिहिबार उच्च अंकको गिरावट भएको छ । आज नेप्से ५८.९९ अंकले घटेर दुई हजार ६ सय ६१ दशमलब ४४ विन्दुमा रोकिएको नेप्सेले जनाएकाे छ । बुधबार नेप्से १५.५० अंकले बढेर दुई हजार सात सय २० दशमलब ४३ विन्दुमा रोकिएको थियो ।  

आज शेयर बजार घटेपनि कारोबार रकम भने बढेको छ । आज ४ अर्ब २९ करोड ३८ लाख बराबरको कारोबार भएको छ । बुधबार ३ अर्ब १३ करोड १२ लाख बराबरको कारोबार भएको थियो ।           

नेप्सेका अनुसार एक कम्पनीको शेयरमूल्यमा उच्च वृद्धि भएको छ । शेयरमूल्यमा वृद्धि हुने कम्पनीमा हिमालयन जनरल इन्स्योरेन्स कम्पनी रहेको छ । यस कम्पनीको शेयरमूल्यमा आज सकारात्मक सर्किट लागेको छ । आज यस कम्पनीको शेयरमूल्य ९.९१ प्रतिशतले बढेर प्रतिकित्ता ७६५ रुपैयाँ पुगेको छ ।

आज चार कम्पनीको शेयरमूल्यमा उच्च गिरावट आएको छ । शेयरमूल्य घट्ने कम्पनीहरुमा न्यादी हाइड्रोपावर, युनिभर्सल पावर कम्पनी, नयाँ सारथी लघुवित्त, सिद्धार्थ इन्स्यारेन्स कम्पनी रहेको छ । यी कम्पनीको शेयरमूल्य पाँच प्रतिशत भन्दा बढीले घटेको छ । कारोबारको आधारमा आज सबैभन्दा बढी नेशनल हाइड्रोपावर कम्पनीको भएको छ ।

आज यस कम्पनीको २६ करोड ९७ लाख भन्दा बढीको कारोबार भएको नेप्सेले बताएकाे छ ।