अर्थतन्त्र

बिहीबार सरकारले बजेटको अर्धवार्षिक समीक्षा गर्ने

• गाउँ सहर संवाददाता
• २७ माघ बिहीबार, २०७८ | १२:५३:०० मा प्रकाशित

 

काठमाडाैं । सरकारले बजेटको अर्धवार्षिक समीक्षा गर्ने भएको छ । बिहीबार सरकारले चालु आर्थिक वर्ष २०७८-७९ को छ महिना अर्थात साउनदेखि पुस मसान्तसम्म बजेटको खर्च तथा राजस्व परिचालनको अवस्थाबारे समीक्षा गर्ने भएको हो ।

सेाही विषयमा छलफलका लागि अर्थमन्त्रालयले आज दिउँसो २ बजेका लागि मन्त्रालयमा नै बैठक बोलाएको छ ।

ओली नेतृत्वको सरकार वहिर्गमनमा परेसँगै शेरबहादुर देउवा नेतृत्वको सरकारले कुल १६ खर्ब ३२ अर्ब ८२ करोड ९२ लाख रुपैयाँ बराबरको प्रतिस्थापन बजेट ल्याएको थियो ।

महालेखा नियन्त्रण कार्यालयका अनुसार चालु आर्थिक वर्षको ६ महिना वितिसक्दा (आजसम्म) कुल बजेटको जम्मा ३५.८३ प्रतिशत अर्थात् ५ अर्ब ८५ करोड ४ लाख २८ हजार मात्र (चालु,पुँजीगत र वित्तीय व्यवस्थापन) खर्च भएको जनाएको छ । 

राजस्व परिचालन तर्फ कुल ११ खर्ब ८० अर्ब ६० करोडको लक्ष्य राखेको सरकारले हालसम्म ६ खर्ब ५ अर्ब ६६ करोड ८७ लाख रुपैयाँ उठिसकेको जनाएको छ । जुन ५१ प्रतिशत हुन्छ ।