गाउँ सहर

पोर्चुगल पठाइदिन्छु भन्दै ४० लाख ठगी गर्ने दुईजना पक्राउ

• गाउँ सहर संवाददाता
• २१ पौष बुधबार, २०७८ | १६:४२:०० मा प्रकाशित

काठमाडौं । पोर्चुगल पठाइदिन्छु भन्दै ४० लाख ठगी गर्ने दुईजनालाई महानगरीय प्रहरीले पक्राउ गरेको छ ।

पक्राउ पर्नेहरूमा बागलुङ गल्कोट-६ का २८ वर्षीय सोती मगर र सर्लाही बागमती-१ का समीर कार्की रहेको महानगरीय अपराध महाशाखाका प्रहरी उपरीक्षक कृष्ण प्रसाद कोइरालाले जानकारी दिए ।

मगर र कार्कीले कोटेश्वरमा युनिवर्ल्ड इन्टरनेसनल टुर्स एण्ड ट्राभल्स प्रालि सञ्चालन गरी  वर्किङ भिसामा पोर्चुगल जान प्रतिव्यक्ति रु. १४ लाख लाग्छ भनी उता पुगेपछि राम्रो होटल तथा कम्पनीमा काममा लगाइदिन्छु मासिक एक भन्दा बढी कमाइ हुन्छ भनेर झुक्याइ ठगी गरेका हुन् ।

उनीहरूले बुटवलका १९ बस्ने २६ वर्षीय लक्ष्मण थापासमेत ४ जना बाट प्रतिव्यक्ति दश लाखका दरले चालिस लाख रुपैयाँ रकम लिई ठगी गरेको प्रहरीले जनाएको छ ।

उनीहरूलाई मंगलबार पक्राउ गरी थप अनुसन्धानको लागि महानगरीय प्रहरी परिसर टेकु, काठमाडौँ पठाइएको प्रहरीको अपराध महाशाखाले जनाएको छ ।