गाउँ सहर

बसका सहचालकको हत्या, ड्राइभरसहित चार जना प्रहरी नियन्त्रणमा

• गाउँ सहर संवाददाता
• २२ मङ्सिर बुधबार, २०७८ | १०:२३:०० मा प्रकाशित

काठमाडाैं । बसका सहचालकको हत्या गरेकाे अभियाेगमा प्रहरीले चार जनालाइ नियन्त्रणमा लिएकाे छ । नुवाकोटको पञ्चकन्या गाउँपालिका–३ राहुटारका सुमन थापाका हत्यामा संलग्न रहेको अभियोगमा गए राति चार जनालाई प्रहरीले नियन्त्रणमा लिएकाे हाे । प्रहरीले पक्राउ पर्नेलाई सार्वजानिक भने गरेको छैन । 

पक्राउ गरेसँगै थापाको शवपरीक्षणका लागि त्रिशूली अस्पतलामा ल्याइएको छ । बा२ख ६५८७ नंको बसमा सहचालकका रूपमा कार्यरत २० वर्षीय थापाको सोमबार राति नुवाकोटको शिवपुरी गाउँपालिका–१ तलाखुमा शव भेट्टिएको थियो ।  हत्यामा संलग्न व्यक्तिको पक्राउ माग गर्दैै पीडित परिवारले मङ्गलबार दिनभर उक्त क्षेत्रमा विरोध प्रदर्शन गरेका थिए ।

पक्राउ परेका व्यक्तिमाथि अनुसन्धान सुरु गरेको जिल्ला प्रहरी कार्यालयका प्रहरी नायब उपरीक्षक रुपक खड्काले जानकारी दिए । उनका अनुसार उनी कार्यरत बसमा रगत लत्पतिएको छ भने त्यसभन्दा करिब ४०० मिटर टाढाको दूरीमा शव पाइएको थियो ।

उक्त बसका चालकसहित चार जनालाई प्रहरीले पक्राउ गरेर कारबाहीका लागि अनुसन्धान सुरु गरेसँगै पीडित परिवारले विरोधका कार्यक्रम स्थगन गरेकाे जनाएकाे छ ।