गाउँ सहर

नेपालमा पनि फेला पर्यो ओमिक्रोन भेरियन्ट

काठमाडौं । पछिल्लो समय विश्वका दर्जनौं देशमा पुगेको कोरोनाभाइरसको ओमिक्रोन भेरियन्ट नेपालमा पनि फेला परेको छ ।

नेपालमा पनि यो नयाँ भेरियन्ट फेला परेको स्वास्थ्य तथा जनसंख्या मन्त्रालयले पुष्टि गरेको हो ।

मन्त्रालयका सहप्रवक्ता समीरकुमार अधिकारीले दुई जनामा ओमिक्रोन भेरियन्ट पुष्टि भएको बताएका छन् ।

उनका अनुसार संक्रमित मध्ये एक जना ६६ वर्षका छन् । उनको सम्पर्कमा रहेका अर्का एक जनालाई पनि संक्रमण पुष्टि भएको हो । अर्का व्यक्ति ७१ बर्षका हुन् ।

हालसम्म ३५ देशमा ओमिक्रोन भेरियन्ट पुष्टि भइसकेको छ । आइतबार मात्रै भारतमा १७ जनामा यो संक्रमण पुष्टि भएको थियो ।

विश्व स्वास्थ्य संगठनले यो भेरियन्टलाई चिन्ताको विषयका रुपमा लिनु पर्ने बताइसकेको छ ।

यसैबीच त्रिभुवन विमानस्थलमा खटिएका एक चिकित्सकका अनुसार पछिल्लो १५ दिनमा विमानस्थलमा भएको एन्टिजेन परीक्षणमा भने कसैमा ओमिक्रोनको संक्रमण देखिएको छैन ।

 

गाउँ सहर संवाददाता