अर्थतन्त्र

किर्तेलाई कर्जा - किसानलाई छैन, कति प्रयाेग-बेप्रयाेग पुनरकर्जा, सहुलियतपूर्ण कर्जा र व्यवसाय निरन्तरता कर्जा ?

• गाउँ सहर संवाददाता
• २ मङ्सिर बिहीबार, २०७८ | ०९:२५:०० मा प्रकाशित

काठमाडाैँ । देशको वर्तमान आर्थिक तथा वित्तीय स्थिति (आर्थिक वर्ष २०७८/७९ को तीन महिनाको तथ्याङ्कमा आधारित) अनुसार नेपाल राष्ट्र बैंकले सहुलियत दरमा प्रदान गर्दै आएको पुनरकर्जा २०७८ असोज मसान्तमा रु.११९ अर्ब ३५ करोड लगानीमा रहेको देखाएकाे छ ।

राष्ट्र बैंकका अनुसार २०७८ असोज मसान्तसम्ममा १ लाख २९ हजार ६ सय ८० ऋणीलाई सहुलियतपूर्ण कर्जा प्रवाह भई रु.१९८ अर्ब ९२ करोड कर्जा बक्यौता रहेको छ । यसमध्ये कृषि तथा पशुपंक्षी व्यवसाय कर्जा अन्तर्गत ५३ हजार ७ सय ८५ ऋणीलाई प्रवाह भएको रु.१२६ अर्ब ८१ करोड कर्जा रहेको छ भने महिला उद्यमशील कर्जा अन्तर्गत ७३ हजार ७८ महिला उद्यमीलाई प्रवाह भएको रु.६८ अर्ब ३२ करोड कर्जा रहेको छ । सहुलियतपूर्ण कर्जाका अन्य शीर्षक अन्तर्गत २ हजार ८ सय १७ ऋणीको रु.३ अर्ब ८० करोड कर्जा बक्यौता रहेको छ ।

“व्यावसायिक निरन्तरता कर्जा प्रवाह कार्यविधि, २०७७” बमोजिम कोभिड–१९ प्रभावित पर्यटन र घरेलु, साना तथा मझौला उद्यम क्षेत्रको व्यवसाय निरन्तरतामा सहयोग पु-याउन ती क्षेत्रका श्रमिक तथा कर्मचारीको पारिश्रमिक भुक्तानीका लागि व्यवस्था गरिएको कर्जा २०७८ असोज मसान्तसम्ममा रु.१ अर्ब ५ करोड स्वीकृत भएको उसले जनएकाे छ ।

राष्ट्र बैंकले याे तथ्यांक बताइरहँदा खेती गरिरहेका किसान बाटाे नभएर कर्जा नपाएकाे गुनासाे गरिरहेका छन् भने अर्थमन्त्री बैंकहरूलाई देउ भनेर भनिरहेका छन् । बैंकहरूले माैद्रिक नीति मानेकाे पनि देखिँदैन । उनीहरू दह्राे जमानी र धिताेबेगर कर्जा प्रवाह गर्न अन्कनाइरहेका छन् । शैक्षिक प्रमाणपत्र राखेर कर्जा दिनुकाे साटाे किर्ते गरेका कागजातलाई सक्कली बनाई कर्जा प्रवाह गरिरहेका छन् ।