गाउँ सहर

'अरु हामी जान्दैनौ, पेट्रोलियम प्रदार्थको मूल्यबृद्धि मान्दैनौ' भन्दै आयल नियम कार्यालय घेराउ

• गाउँ सहर संवाददाता
• २६ कार्तिक शुक्रबार, २०७८ | १३:२०:०० मा प्रकाशित

काठमाडाैं । पेट्रोलियम पदार्थको मूल्यवृद्धि तत्काल फिर्ता लिन सरकारसँग माग गर्दै आएको संयुक्त विद्यार्थी सङ्गठनले टेकुमा रहेकाे नेपाल आयल निगमको केन्द्रीय कार्यालय घेराउ गरेको छ । 

आज बिहान १० बजेबाट नेपाल आयल निगमको केन्द्रीय कार्यालय घेराउ गर्दै विद्यार्थी सङ्गठनहरुले तत्काल मूल्यवृद्धि फिर्ता गर्न सरकारलाई दबाब दिएका हुन् । 

आम नागरिक र विद्यार्थीहरुलाई चुल्हो समेत बल्न नदिने गरी एलपी ग्याँसलगायतका पेट्रोलियम पदार्थको मूल्य वृद्धि गरेको भन्दै उनीहरुले निगमका कार्यकारी निर्देशक सुरेन्द्र पौडेलको राजीनामाकाे माग गर्दै नाराबाजी गरेका थिए ।

उनीहरूले 'अरु हामी जान्दैनौ पेट्रोललियम प्रदार्थको मूल्यबृदि मान्दैनौ' भन्दै नारा लगाएका थिए ।

सत्तारुढ नेकपा (माओवादी केन्द्र)मा आबद्ध विद्यार्थी सङ्गठन अनेरास्ववियु (क्रान्तिकारी), नेकपा (एकीकृत समाजवादी)मा आबद्ध अनेरास्ववियुसहितका विद्यार्थी सङ्गठनका नेताहरुले विराेध प्रदर्शन गरेका हुन् । 

पेट्रोलियम पदार्थको पछिल्लो पटक मूल्यवृद्धि गरिएपछि प्रमुख प्रतिपक्ष दल नेकपा एमालेमा आबद्ध विद्यार्थी सङ्गठन अनेरास्ववियुले पनि सरकारविरुद्धको आन्दोलन गरिरहेकाे छ ।