अर्थतन्त्र

दशैंको विदापछिकाे दोस्रो कारोबार दिन शेयरबजार राताम्मे

• गाउँ सहर संवाददाता
• १ कार्तिक सोमबार, २०७८ | १६:११:०० मा प्रकाशित

काठमाडाैं । दशैंको विदापछि अर्थात साताको दोस्रो कारोबार दिन सोमबार शेयरबजार राताम्मे भएको छ । 

सोमबार नेप्से परिसूचक ६८.९० अंकले घटेर २५८८ अंकमा सीमित भएको छ । यस दिन २१८ कम्पनीको ४० हजार ४०१ पटकको कारोबारमा २ अर्ब ९६ करोड ६८ लाख ९९ हजार रुपैयाँ बराबरको ८७ लाख ७६ हजार कित्ता शेयर खरिदबिक्री भएको छ ।

यो दिन जम्मा १० वटा कम्पनीको सेयर मूल्य बढेको छ । साथै २०६ वटा कम्पनीको सेयर मूल्य ओरालो लागेको छ भने २ वटा कम्पनीको सेयर मूल्य स्थिर भएको छ ।

यो दिन उपसमूहतर्फ ट्रेडिङबाहेक सबैमा गिरावट देखिएको छ ।

यो दिनको कारोबारमा घलेम्दी हाइड्रोपावर कम्पनीको सेयरमा नकारात्मक सर्किट लागेको छ । साथै, युनाइटेड मोदी हाइड्रोपावर, कालिका पावर कम्पनी, युनिभर्सल पावर कम्पनी, बरुण हाइड्रोपावर कम्पनीलगायतका कम्पनीको सेयर मूल्य पनि घटेको छ ।

कात्तिक महिनाको पहिलो कारोबार दिन अधिकांश बैंकहरुले नयाँ ब्याजदर सार्वजनिक गरेका थिए । गत महिनाको तुलनामा बैंकहरुको ब्याजदर बढेको छ। बजारसँग नकारात्मक सम्बन्ध गरेको ब्याजदर बढेपछि यस दिन बजार घट्न पुगेको हो ।