स्वास्थ्य

काठमाडौँमा सभा–जुलुस तथा भीडभाड गर्न रोक, काेराेना संक्रमितमध्ये भेन्टिलेटरका बिरामी बढे

काठमाडौँ । कोरोनाभाइरसका कारण पछिल्लो २४ घण्टामा थप १२ जनाको मृत्यु भएको छ । योसहित कुल मृतकको संख्या ११ हजार १३५ पुगेको छ ।

स्वास्थ्य तथा जनसंख्या मन्त्रालयका अनुसार नयाँ १ हजार ७८ संक्रमित थपिएका छन् । सोसहित कुल संक्रमितको संख्या पिसिआर परीक्षणबाट ७ लाख ९५ हजार ६१ र एन्टिजेन विधिबाट ९१ हजार ५५३ पुगेको छ । 

मन्त्रालयका अनुसार पछिल्लो समयमा निको हुनेको संख्या ९११ छ । योसहित कुल निको हुनेको संख्या ७ लाख ६५ हजार ७५८ पुगेको छ ।

मन्त्रालयका अनुसार अहिले ३५३ जना संक्रमित सघन र ११७ जनाको भन्टिलेटरमा उपचारार्थ छन् । देशभरका संस्थागत क्वारेन्टाइनमा रहनेको संख्या २३८, होम आइसोलेशनमा रहने १६ हजार ८०२ र संस्थागत आइसोलेशनमा १ हजार ३६६ रहेका छन् ।

देशमा सक्रिय संक्रमण १८ हजार १६८ मा रहेको छ ।

मन्त्रालयका अनुसार निको हुनेको प्रतिशत ९६.३ छ । पूर्ण खोप लगाउनेको संख्या ६२ लाख ८५ हजार ७४० पुगेको छ । पछिल्लो २४ घण्टामा मात्र २ लाख ८९ हजार ३८१ जनाले खोप लगाएका छन् ।

मन्त्रालयका अनुसार संक्रमण दर १८.९ प्रतिशत र मृत्यु प्रति दशलाखमा ३७५.३ रहेको छ । अझैपनि ९ जिल्लामा ५०० बढी संक्रमित र १९ जिल्लामा २०० बढी संक्रमित रहेका छन् ।

यसैबीच जिल्ला प्रशासन कार्यालय काठमाडौँले अनावश्यक रुपमा भीडभाड, सभा, जुलुस, जात्रा, महोत्सव तथा भोज गर्न पुनः रोक लगाएको छ ।

काठमाडौँमा प्रमुख जिल्ला अधिकारी गोबिन्द प्रसाद रिजालद्वारा बिहीबार जारी आदेशमा आज राति १२ः०० बजेदेखि लागू हुने गरी सभा, जुलुस, जात्रा, महोत्सव तथा भोज गर्न नपाइने उल्लेख छ ।

कोरोना भाइरस संक्रमणको जोखिम कायमै रहेको भन्दै अनिवार्य मास्क प्रयोग गर्न, दूरी कायम गर्न तथा घरभित्रै रहेर न्यूनतम सहभागितामा चाडपर्व मनाउन पनि जिप्रकाले आग्रह गरेको छ ।

यस्तै सार्वजनिक यातायातमा निर्धारित सिट संख्या भन्दा बढी यात्रु नचढाउन पनि प्रशासनको आग्रह छ । अर्को आदेश जारी नभएसम्मका लागि यस्तो व्यवस्था गरिएको प्रशासनले जनाएको छ ।

आदेश पालना नभए कानुन बमोजिम कारबाही गरिने प्रशासनले चेतावनी दिएको छ ।

गाउँ सहर संवाददाता

तपाईँको मत