राजनीति

कांग्रेस संस्थापनइतरका जिल्ला सभापतिको बैठकमा महाधिवेशनदेखि खाेप र भ्रष्टाचारबारे छानबिनका कुरा

• गाउँ सहर संवाददाता
• २६ श्रावण मंगलबार, २०७८ | १२:५४:०० मा प्रकाशित

काठमाडाैं । सोमबारदेखि सुरु नेपाली कांग्रेस वरिष्ठ नेता रामचन्द्र पौडेल पक्षका जिल्ला सभापतिहरुको भेला जारी रहेको छ । बैठकमा जिल्ला सभापतिहरुले आ-आफ्नो धारणा राखिरहेका छन् ।

अधिकांश जिल्ला सभापतिहरू १४ औं महाधिवेशन तोकिएको मितिमा हुन नसक्ने हो भने विशेष महाधिवेशनमा जानुपर्ने पक्षमा देखिएका छन् ।

१४औं महाधिवेशन तोकिएको समयमा नहुने परिस्थिति सिर्जना हुँदै गएपछि आफ्नो पक्षको रणनीति बनाउन पौडेल पक्षका जिल्ला सभापतिको भेला बोलाइएको हो ।

भदौमा महाधिवेशन हुन नसकेको खण्डमा कोरोनाकाललाई शून्य समय मानेर मंसिरमा महाधिवेशन गर्न सकिने कुरा आएपनि त्यसको साटो विशेष महाधिवेशन नै हितकर हुने उनीहरुको जिकिर छ । 

नेपाली कांग्रेस जस्तो लोकतान्त्रिक पार्टी अधिवेशन गर्न नसक्ने अवस्थामा पुग्नु जनमानसमा पनि नकारात्मक सन्देश जाने कांग्रेस जिल्ला सभापतिहरूको निष्कर्ष छ । 

प्रत्यक्ष ३६ जना र भिडिओ संवादमार्फत् थप १२ जिल्लाका सभापतिको छलफलमा सहभागिता रहेको कांग्रेस नुवाकोट सभापति जगदीश्वर नरसिंह केसीले बताए । जिल्ला सभापतिको भेलाको समापन सम्बोधन वरिष्ठ नेता पौडेलले गर्ने भएका छन् । 

पार्टी सरकारमा पनि भएको सन्दर्भमा सबै नागरिकलाई छिटोभन्दा छिटो खोपको व्यवस्था गर्न पनि जिल्ला सभापतिहरूले ध्यानाकर्षण गराएका छन् । यस्तै भ्रष्टाचारबारे छानबिनका लागि निष्पक्ष न्यायिक आयोग बनाएर काम गर्न पनि सरकारलाई जिल्ला सभापतिहरूले सुझाव दिएका छन् ।