गाउँ सहर

दुर्घटनामा घाइते प्रहरी निरीक्षक वाग्लेको निधन

• गाउँ सहर संवाददाता
• २६ श्रावण मंगलबार, २०७८ | ०७:१७:०० मा प्रकाशित

नवलपरासी । मोटरसाइकलको ठक्करबाट गम्भीर घाइते भएका इलाका प्रहरी कार्यालय बर्दघाटका प्रहरी निरीक्षक कपिल वाग्लेको निधन भएको छ । 

गएराति साढे ८ बजे पूर्व पश्चिम राजमार्गमा पैदल हिँडिरहेका वाग्लेलाई लु १४ प ८७५८ नम्बरको मोटरसाइकलले ठक्कर दिएको थियो । 

ठक्करबाट गम्भीर घाइते भएका वाग्लेलाई उपचारका लागि भैरहवामा रहेको युनिभर्सल मेडिकल कलेजमा लगिएकोमा उपचारकै क्रममा रातको ११ बजे मृत्यु भएको नवलपरासी प्रहरीले जनाएको छ । 

वाग्लेलाई ठक्कर दिने मोटरसाइकलका चालक सुनवल नगरपालिका वडा नम्बर १ का दिपेन्द्र पुन पनि गम्भीर घाइते भएका छन् । उनको युनिभर्सल मेडिकल कलेजमै उपचार भैरहेको प्रहरीले जानकारी दिएको छ ।

प्रहरी निरीक्षक वाग्ले अख्तियार दुरुपयोग अनुसन्धान आयोग टंगालबाट सरुवा भै २०७७ पुष १२ गते इलाका प्रहरी कार्यालयको प्रमुखको रुपमा बर्दघाट आएका थिए ।