राजनीति

प्रधानमन्त्रीलाई पूर्वमन्त्री गिरीकाे प्रश्नः ‘के नेपाली जनताले यी सब घटनालाई बिर्सीसके भन्ने ठानिएको हो ?’

• गाउँ सहर संवाददाता
• ३१ जेठ सोमबार, २०७८ | २१:२१:०० मा प्रकाशित

काठमाडौँ । राष्ट्रिय प्रजातन्त्र पार्टी (राप्रपा) का नेता तथा पूर्वमन्त्री दिलनाथ गिरीले पाँच प्रधानमन्त्रीका संयुक्त विज्ञप्ति प्रधानमन्त्री केपी ओलीले बाह्र बुँदे संझौता खारेज गरे बेरोजगार भइन्छ भन्ने त्रासको उपज भएको बताएका छन् ।

‘पाँच पूर्वप्रधानमन्त्रीका नेपालको आन्तरिक मामिलामा वाह्य हस्तक्षेप सह्य हुने छैन भन्ने विचार स्वागतयोग्य छ । तर, उहाँहरूकै नेतृत्वमा विगतमा प्रत्यक्ष वैदेशिक हस्तक्षेप भित्रिएको छ । ती घटनाक्रम नेपालीहरूको मानसपटलमा ताजै छन्,’ राप्रपा कार्यसम्पादन समिति सदस्य गिरीले सोमबार भने ।

गिरीको भनाइमा, लोभलालच र विदेशीको प्रलोभनमा परी महाकाली सन्धि, चालीस लाख विदेशीलाई नागरिकता, बाह्र बुँदे संझौता, राजसंस्था र हिन्दुराष्ट्रलाई किनारा लगाई राष्ट्रघात गरीएको हो । सत्र हजार निर्दोष मानिसको हत्या र हिंसाजन्य गतिविधि त्यसै दुष्कर्मको निरन्तरता हो ।

‘के नेपाली जनताले यी सब घटनालाई बिर्सीसके भन्ने ठानिएको हो ?’ गिरीले सामाजिक संजालमा पाँच प्रधानमन्त्रीलाई प्रश्न गर्दै भने ।