राजनीति

कांग्रेससँग विश्वासको मत माग्न पुगेका प्रधानमन्त्री ओलीलाई देउवाले भने- दिन सक्दैनौँ

• गाउँ सहर संवाददाता
• २२ बैशाख बुधबार, २०७८ | १८:३०:०० मा प्रकाशित

काठमाडौं । विश्वासको मत दिनका अाग्रह गर्दै प्रमुख प्रतिपक्षी दल नेपाली कांग्रेसका सभापति शेरबहादुर देउवा निवासमा पुगेका प्रधानमन्त्री केपी शर्मा ओलीलाई देउवाले विश्वासको मत दिन नसक्ने बताएका छन् । 

देउवा निवास बूढानीलकण्ठमा बुधबार अपरान्ह भएको छलफलमा ओलीले विश्वासको मत दिन देउवालाई आग्रह गरेका थिए ।

जवाफमा देउवासहितका कांग्रेस नेताहरूले विश्वासको मत दिन नसकिने बताएको कांग्रेस नेता प्रकाशशरण महतले बताए । 

'प्रतिपक्षी दल भएकाले विश्वासको मत दिन सक्दैनौँ,' देउवाको भनाइ उदृत गर्दै नेता महतले भने । कांग्रेसको मंगलबार बसेको पदाधिकारी बैठकले प्रधानमन्त्री ओलीलाई विश्वासको मत प्राप्त गर्नबाट रोक्ने निर्णय गरेको थियो ।

भेटमा एमाले अध्यक्ष समेत रहेका प्रधानमन्त्री ओलीसहित एमालेका तर्फबाट महासचिव ईश्वर पोखरेल र नेताहरू सुवासचन्द्र नेम्वाङ, रामबहादुर थापा 'बादल', विष्णु पाैडेल सहभागी थिए ।

कांग्रेसका तर्फबाट सभापति देउवासहित वरिष्ठ नेता रामचन्द्र पाैडेल, कृष्ण सिटाैला, विमलेन्द्र निधी, शशांक कोइराला, पूर्णबहादुर खड्का, प्रकाशशरण महतलगायत सहभागी थिए ।