कृषि

पच्चीस सय बाेरा युरिया मल वीरगञ्ज आइपुग्यो

• गाउँ सहर संवाददाता
• २५ फाल्गुण मंगलबार, २०७७ | १८:३१:०० मा प्रकाशित

काठमाडाैं । बंगलादेशबाट २५ सय बोरा मंगलबार दिउँसो वीरगञ्जस्थित सुख्खा बन्दरगाहमा आइपुगेको छ ।

सरकारले बंगलादेशसँग जीटुजी (सरकार–सरकार) मार्फत ५० हजार मेट्रिक टन युरिया मल ल्याउने सहमति गरे बमोजिम पहिलो चरणमा २२ हजार पाँच सय मेट्रिक टन युरिया मल ल्याईने लागिएकाे छ । साेही क्रममा २५ सय बाेरा मंगलबार नेपाल भित्रिएकाे हाे । 

सरकार–सरकारको बीचमा मलका लागि सम्झौता भएको दिनदेखि पाँच महिनापछि पहिलो चरणको मल आइपुगेको हो भने तीन चरणमा मल ल्याउने तयारी कृषि सामग्री केन्द्र लिमिटेडको रहेको छ ।

पहिलो चरणमा २२ हजार पाँच सय मेट्रिक टन , दोस्रो चरणमा १० हजार मेट्रिक टन र तेस्रो चरणमा १७ हजार मेट्रिक टन मल ल्याउने तयारी कृषि सामग्री केन्द्र लिमिटेडले गरेको छ ।

सुरुमा बंगलादेशबाट पैँचोमा ५० हजार मेट्रिक टन युरिया मल ल्याउने सहमति भए पनि पैँचो मल दिने प्रक्रिया झन्झटिलो भएको बंगलादेशले जनाएपछि सरकार–सरकारबीच सम्झौता गरी खरिद गरेर नै मल ल्याइएको छ ।