शिक्षा

असारबाट शुरू हुन लागेकाे शैक्षिक सत्र चैत्रमा सकाउने तयारी

• गाउँ सहर संवाददाता
• १८ फाल्गुण मंगलबार, २०७७ | ०९:४१:०० मा प्रकाशित

काठमाडौं । यसपालीकाे शैक्षिक सत्र असारबाट शुरू भएपनि अर्काे वर्षकाे शैक्षिक सत्र भने वैशाखमै गर्ने तयारीमा सरकार लागेकाे छ । 

कोरोना भाइरस (कोभिड–१९)का कारण बिग्रेको शैक्षिक सत्रलाई समयमै व्यवस्थापन गर्न १० महिनाभित्र शैक्षिक सत्र सक्ने निर्णयमा सरकार पुगेको हो ।

सोअनुसार २०७८ सालको शैक्षिक सत्र आगामी असार १ मा सुरु भई सोही सालको चैत मसान्तभित्र पूरा गर्नुपर्नेछ । शिक्षा तथा मानव स्रोत विकास केन्द्रका विद्यार्थीको समयको क्षतिलाई न्यून गर्दै शैक्षिक सत्र मिलाउने तयारीअनुसार नै सरकारले आगामी शैक्षिक सत्र १० महिनामा पूरा गर्ने निर्णयमा पुगेको हाे ।

पाठ्यक्रमलाई तोकिएको ढाँचामा घटाएर चैतभित्र पठनपाठन पूरा गर्ने सरकारी योजना छ । शैक्षिक सत्रलाई चैतभित्र पूरा गर्दा केही बिदालाई समेत मिलाउने सरकारी योजना छ ।