अर्थतन्त्र

बिहीबार शेयरबजारकाे अवस्था यस्ताे रह्याे

• गाउँ सहर संवाददाता
• २९ माघ बिहीबार, २०७७ | १६:४५:०० मा प्रकाशित

काठमाडाैं । बुधबार सामान्य अंकले बढेकाे नेप्से परिसूचक बिहीबार (आज) घटेर बन्द भएको छ । 

बिहीबार नेप्से १६.११ अंकले घटेर २५२६.९२ विन्दुमा पुगेको छ । यसदिन २०६ कम्पनीका १ करोड ६० लाख कित्ता शेयर ८ अर्ब ४१ करोड रुपैयाँ बराबरमा किनबेच भएको छन् । कारोबार रकम अघिल्लो दिनको तुलनामा ७७ करोडले बढेको हो । बुधबार ७ अर्ब ६४ करोड बराबरको शेयर कारोबार भएको थियो ।

 

बुधबार शेयरबजार सकारात्मक भएर बन्द भएपछि लगानीकर्ताहरुले यस दिन पनि सकारात्मक हुने अपेक्षा गरेका थिए । कारोबार अवधिमा नेप्सेले पनि बारम्बार माथि उक्लिने प्रयास गरेको थियो तर, बजारमा बिक्रीकर्ताको चाप बढी भएको कारण उक्लिन सफल हुन सकेन ।

पछिल्लो समयमा बैंकिङ्ग समूहतर्फ लगानीकर्ताको ध्यान तानिएपनि आशा अनुरुप चलायमान हुन सकेको छैन् । बजार बाट बाहिरीएका लगानीकर्ताहरु बजार करेक्शनको पर्खाइमा रहेका छन् । बजार करेक्शन हुँदै अघि बढ्दै गरेको अस्वस्था रहेकाले पनि तत्काल बजारमा ठूलो गिरावट नआउने विश्लेषकहरुको अनुमान छ । 

यसदिन बैंकिङ्ग र विकास बैंक उपसमूहको परिसूचक सामान्य अंक बढेपनि अन्य उपसमूहका परिसूचक ओरालो लागेपछि नेप्से घट्न दबाब पुगेको हो ।

यस दिन बैंकिङ्ग उपसमूहको परिसूचक ०.६ प्रतिशत बढेको छ भने विकास बैंकको ०.७७ र म्युचुअल फण्डको ०.२२ प्रतिशत बढेको छ । कारोबारमा आएका लघुवित्त र होटल उपसमूहको परिसूचक यस दिन २ प्रतिशतभन्दा बढी घटेको छा। त्यसैगरी, व्यापार, हाइड्रोपावर, वित्त, निर्जीवन बीमा, उत्पादन तथा प्रशोधन, अन्य र जीवन बीमा उपसमूहको परिसूचक १ प्रतिशतभन्दा बढी घटेको छा।

बिहीबारको कारोबारमा डिप्रोक्स लघुवित्तको सबैभन्दा धेरै ५६ करोड बढीको शेयर किनबेच भयो । दोस्रोमा नबिल बैंकको ३८ करोड बढीको शेयर किनबेच भएको छ ।

यसदिन चन्द्रागिरी हिल्स, लुम्बिनी विकास, ज्योति विकास, अरुण काबेली लगायतको शेयर मूल्य उच्चदरले बढेको छ । 

कारोबारमा आएका सर्पोट माइक्रोफाइनान्स र डिप्रोक्सको शेयर नकारात्मक सर्किट लेभलमा कारोबार भएको छ।