समाज

प्रसूति बिदा ६ महिना पुर्‍याउने सरकारको प्रस्ताव

• गाउँ सहर संवाददाता
• ६ असोज मंगलबार, २०८३ | ०९:४२:०० मा प्रकाशित

काठमाडौँ। सरकारले सरकारी, गैरसरकारी तथा निजी क्षेत्रमा कार्यरत महिलाको तलबसहितको प्रसूति बिदा ९८ दिनबाट बढाएर ६ महिना पुर्‍याउने प्रस्ताव गरेको छ ।

सुरक्षित मातृत्व तथा प्रजनन स्वास्थ्य अधिकार ऐन, २०७५ संशोधन गर्न बनेको विधेयकमा यस्तो प्रस्ताव गरिएको हो । विधेयक स्वास्थ्य तथा खाद्य स्वच्छतामन्त्री निशा मेहताले प्रतिनिधि सभामा दर्ता गरेकी हुन्।

विश्व स्वास्थ्य सङ्गठनको सिफारिसअनुसार शिशुलाई जन्मेको छ महिनासम्म पूर्ण स्तनपान गराउनुपर्ने भएकाले कामकाजी महिलालाई पर्याप्त समय उपलब्ध गराउने उद्देश्यले बिदा बढाउन प्रस्ताव गरिएको सरकारले जनाएको छ ।

विधेयकमा पुरुष कर्मचारीको प्रसूति स्याहार बिदा १५ दिनबाट बढाएर ४२ दिन पुर्‍याउने प्रस्तावसमेत गरिएको छ । चिकित्सकको सिफारिसमा जटिल शल्यक्रिया गर्नुपर्ने अवस्थामा थप ३० दिन बिदा दिने व्यवस्था पनि प्रस्ताव गरिएको छ ।

यस्तै, गर्भावस्थादेखि सुत्केरी अवस्थासम्म महिलामाथि शारीरिक, मानसिक वा यौन हिंसा गर्न नहुने तथा बलपूर्वक गर्भपतन गराउने कार्यलाई कसुर मान्ने गरी कानुनी व्यवस्था थप गर्न प्रस्ताव गरिएको छ।