राजनीति

पार्टीलाई एकताबद्ध बनाएर लैजाने जिम्मेवारी अब सभापति गगन थापाको काँधमा - नेता विश्वकर्मा

• गाउँ सहर संवाददाता
• ५ बैशाख शनिबार, २०८३ | १९:५५:०० मा प्रकाशित

काठमाडौँ । नेपाली कांग्रेसका नेता मीन विश्वकर्माले सर्वोच्च अदालतको फैसलालाई स्वीकार गर्दै पार्टीलाई एकताबद्ध बनाएर लैजाने जिम्मेवारी अब सभापति गगन थापाको काँधमा आएको बताएका छन् ।

सर्वोच्च अदालतले नेपाली कांग्रेसको आधिकारिकता थापा नेतृत्वको समूहलाई दिने फैसला गरेपछि उत्पन्न परिस्थितिबारे नेता विश्वकर्माले यस्तो धारणा राखेका हुन् ।

शनिबार काठमाडौँको गोल्फुटारस्थित पूर्वउपसभापति पूर्णबहादुर खड्काको निवासमा आयोजित निवर्तमान पदाधिकारी तथा केन्द्रीय सदस्यको अनौपचारिक छलफलपछि सञ्चारकर्मीसँग कुरा गर्दै उनले सो कुरा बताएका हुन् ।

पार्टीभित्रको कानुनी विवाद अन्त्य भएसँगै अब सबै मिलेर अघि बढ्नुपर्नेमा उनले जोड दिए । अदालतको फैसलाका केही प्राविधिक विषयमा असहमति रहे पनि कांग्रेस कानुनी राज्य र स्वतन्त्र न्यायपालिकाको सम्मान गर्ने पार्टी भएकाले फैसला शिरोधार्य गर्ने उनको भनाइ छ ।