गाउँ सहर

बेइजिङ पुगे प्रधानमन्त्री ओली, उपमन्त्रीले गरे स्वागत

• गाउँ सहर संवाददाता
• १७ मङ्सिर सोमबार, २०८१ | १७:४८:०० मा प्रकाशित

काठमाडाैं । प्रधानमन्त्री केपी शर्मा ओली चारदिने औपचारिक भ्रमणमा बेइजिङ पुगेका छन् । चिनियाँ प्रधानमन्त्री ली छ्याङको औपचारिक निमन्त्रणामा प्रधानमन्त्री ओली साेमबार चीन भ्रमणमा गएका हुन् ।

ओलीलाई बेइजिङस्थित क्यापिटल अन्तर्राष्ट्रिय विमानस्थलमा चिनियाँ कम्युनिस्ट पार्टीका वैदेशिक मामिला उपमन्त्री सुन बेइदाेङले स्वागत गरेका छन् । उक्त अवसरमा चीनका लागि नेपाली राजदूत कृष्णप्रसाद ‌ओली र नेपालका लागि चिनियाँ राजदूत छन साेङ पनि उपस्थित थिए ।

परराष्ट्र मन्त्रालयका अनुसार प्रधानमन्त्री ओलीले मंगलबार चीनका प्रधानमन्त्री ली छ्याङसँग औपचारिक रूपमा द्विपक्षीय वार्ता गर्ने कार्यक्रम छ । सोही द्विपक्षीय वार्तामा दुई मुलुकबीचका एजेन्डाहरूमा छलफल हुने तथा सहमति र सम्झौतामा हस्ताक्षर हुने कार्यक्रम छ ।

प्रधानमन्त्री ओलीले मंगलबार नै चीनका राष्ट्रपति सी चिनफिङसँग द्विपक्षीय भेटवार्ता गर्ने कार्यक्रम रहेको छ । सोही दिन चिनियाँ जनकंग्रेसका स्थायी समितिका अध्यक्ष झाओ लेजीसँग भेटवार्ता गर्ने कार्यक्रम पनि रहेको छ ।

प्रधानमन्त्री ओलीले बुधबार पेकिङ विश्वविद्यालयमा सम्बोधन गर्ने कार्यक्रम रहेको छ । साथै, उनले साेही दिन नेपाल–चीन बिजनेस फोरमले आयोजना गर्ने कार्यक्रमलाई सम्बोधन गर्ने छन् । बेइजिङस्थित नेपाली दूतावासले आयोजना गरेको एक कार्यक्रममा पनि प्रधानमन्त्री ओली सहभागी हुने छन् ।