ब्लग

गायिका एलिना र विष्णुलाई चिट्ठी

• सन्ताेष सिम्खडा
• २० माघ आइतबार, २०८१ | ११:१७:०० मा प्रकाशित

प्रीय, एलिना जी र विष्णु जी,

जीवन कहिलेकाहीँ हामीले सोचेभन्दा धेरै अनपेक्षित मोड लिन्छ। जसरी नदीको धाराले आफ्नो गन्तव्य बदलेर नयाँ बाटो बनाउँछ, त्यसरी नै हाम्रो सम्बन्धहरू पनि परिस्थितिअनुसार बदलिन सक्छन्। हिजो तपाईंहरू दुई आत्माहरू एउटै सपना बोकेर अघि बढ्नुभएको थियो, तर आज परिस्थितिले तपाईँहरूलाई फरक दिशातर्फ डोर्याएको छ। तर के सम्बन्धको अन्त्य जीवनको अन्त्य हो? होइन। यो त नयाँ सुरुवातको संकेत मात्र हो।

सम्बन्ध निभाउन प्रेम मात्रै पर्याप्त हुँदैन। माया गहिरो हुनु जरुरी छ, तर त्यो मायाले विश्वास, सम्मान र समझदारीको आधार खोज्छ। जब ती कुराहरू कमजोर बन्दै जान्छन्, सम्बन्धको सन्तुलन गुम्न थाल्छ। विवाह दुई व्यक्तिबीचको मात्र सम्बन्ध होइन, यो सपना, आशा, भरोसा र भविष्यको मिलन हो। तर जब कुनै सम्बन्धमा सहजता हराउँदै जान्छ, जब आत्मसम्मान खल्बलिन थाल्छ, तब कहिलेकाहीँ टाढिनु नै उचित निर्णय बन्छ।

तपाईंहरूको यो निर्णय समाजका लागि अनौठो हुन सक्छ, तर के समाज तपाईंहरूको पीडालाई बुझ्न सक्ला? जसरी विवाह तपाईँहरूको सहमतिमा भएको थियो, त्यसरी नै यो डिभोर्स पनि तपाईंहरूको परिपक्व निर्णय हो। सम्बन्धको समाप्तिलाई पराजयको रूपमा हेर्नुहुँदैन। बरु, यो एक अवसर हो-आफूलाई चिन्ने, नयाँ लक्ष्य कोर्ने र अझ दृढ भएर अगाडि बढ्ने।

एलिना जी, तपाईं केवल एक गायिका मात्र होइन, नेपाली संगीत क्षेत्रमा स्थापित हस्ती हुनुहुन्छ। तपाईँको गीतहरूले धेरैलाई प्रेम गर्न सिकाएको छ, धेरैलाई बिछोडको पीडामा मल्हम लगाएको छ। तपाईँको स्वरमा त्यो जादू छ, जसले हजारौँ मनहरूलाई छोएको छ। आज तपाईँको व्यक्तिगत जीवनले नयाँ मोड लिएको छ, तर यसले तपाईँको प्रतिभालाई रोक्ने छैन। बरु, यो अनुभवले तपाईँको गीतहरूलाई झन् गहिराइ दिनेछ, झन् सजीव बनाउनेछ।

याद राख्नुहोस्, वास्तविक कलाकार ती हुन् जसले आफ्ना भावनाहरूलाई सिर्जनामा ढाल्न सक्छन्। हिजोका पीडाहरू, खुशीका क्षणहरू, विछोडका वेदनाहरू-यी सबैलाई संगीतमा बदल्नुहोस्। तपाईँको गीत सुनेर कतिले आफूलाई देख्नेछन्, कतिले आफ्ना कथा सम्झनेछन्। तपाईँको सिर्जनाले तपाईँलाई अझ माथि उठाउनेछ।

विष्णु जी, तपाईँ व्यवसायी हुनुहुन्छ। व्यवसाय भनेको केवल आर्थिक सफलता मात्र होइन, यो एउटा यात्रासमेत हो-जहाँ धैर्य, आत्मविश्वास, अनि कठिन परिश्रमको परीक्षा लिइन्छ। जीवनको हरेक मोडले केही न केही सिकाउँछ। तपाईँले पनि यो अनुभवबाट नयाँ पाठ सिक्नुभएको छ। विगतलाई बोकेर होइन, त्यसबाट प्रेरणा लिएर अघि बढ्नुस्। सम्बन्धको अन्त्यलाई बाधा होइन, अवसरको रूपमा लिनुस्।

अस्ट्रेलियाको फरक भूमिमा संघर्ष गरेर, त्यहाँ आफ्नो पहिचान बनाउनुभएको छ। आजको निर्णयले तपाईँलाई केही समयका लागि कमजोर बनाउनेछ, तर तपाईँको मेहनत, लगनशीलता र आत्मबलले तपाईँलाई फेरि बलियो बनाउनेछ। यो संसार केवल एक सम्बन्धमै सिमित छैन। तपाईँको जीवनमा अझ धेरै अवसरहरू आउँदैछन्, अझ धेरै सपना पूरा गर्न बाँकी छन्।

समाजले आफ्नै तरिकाले टिप्पणी गर्नेछ। हिजो जसले तपाईँहरूको विवाहमा ताली बजाएका थिए, तीमध्ये कतिले आज आलोचना पनि गरिरहेका होलान्। तर समाजका लागि होइन, आफू र आफ्नो आत्मशान्तिका लागि बाँच्नुपर्छ। बाध्यता, संकोच वा डरले बाँधिएको सम्बन्ध कुनै बन्दीगृहभन्दा फरक हुँदैन। आत्मसम्मानलाई जोगाएर, नयाँ आशाका साथ अघि बढ्नु नै साँचो आत्मस्वीकृति हो।

सम्बन्ध टुंगिएपछि पनि सम्झनाहरू मेटिँदैनन्। ती मीठा पलहरू, खुशीका क्षणहरू, सँगै बिताइएका अनगिन्ती दिनहरू-यी सबै जिन्दगीभरि मनको कुनै कुनामा रहिरहनेछन्। कुनै गीत सुन्दा, कुनै बाटोमा हिंड्दा, कुनै विशेष दिनहरूमा ती यादहरूले मन भारी बनाउन सक्छ। तर सम्झनुहोस्, समयले घाउहरू निको पार्छ। समयको एउटा चक्र सकिएपछि अर्को चक्र सुरु हुन्छ।

जीवन यहाँ रोकिँदैन। यो यात्रा अझै बाँकी छ। तपाईँहरू दुवैजनाले आफूले रोजेको मार्गमा अझ सफल बनून्। एलिना जी, तपाईँका गीतहरू अझ गहिरा बनून्, संगीतको संसारमा अझ माथि पुग्नुस्। विष्णु जी, तपाईंको व्यवसाय अझ फैलियोस्, तपाईंको पहिचान अझ मजबुत बनोस्। विगतलाई बोकेर होइन, सिकेर अघि बढ्नुहोस्।

शुभकामना!

तपाईँहरूको उज्यालो भोलिको यात्रा सफल रहोस्।