गाउँ सहर

करेन्ट लागेर दाङमा एकै घरका तीन जनाको मृत्यु

• गाउँ सहर संवाददाता
• १० चैत शनिबार, २०८० | १८:३६:०० मा प्रकाशित

घोराही । दाङमा करेन्ट लागेर एकै घरका तीन जनाको मृत्यु भएको छ। मृत्यु हुनेमा राप्ती गाउँपालिका-३ घण्टदेव चोक निवासी ५५ वर्षीया दिलसरा केसी, उनका श्रीमान ६० वर्षीय गोरखबहादुर केसी र चार वर्षीय नाती कृष्ण केसी रहेको जिल्ला प्रहरी कार्यालय दाङका प्रवक्ता एवं प्रहरी नायव उपरीक्षक जनकबहादुर मल्लले जानकारी दिएका छन्।

प्रहरी नायव उपरीक्षक मल्लका अनुसार शनिबार दिउँसो हाइटेन्सन लाइनको विद्युतको तार चुडिएर घरको आगनमा खस्दा करेन्ट लागेर दिलसरा र नाती कृष्णको घटनास्थलमै मृत्यु भएको थियो। करेन्ट लागेर गम्भीर घाइते हुनुभएका गोरखको उपचारका क्रममा लुम्बिनी प्रादेशिक अस्पताल बुटवलमा मृत्यु भएको जिल्ला प्रहरी कार्यालय दाङले जनाएको छ। 

नेपाल विद्युत प्राधिकरणको हाइटेन्सन लाइनको तार एक्कासी चुँडिएर घरको आँगनमा खस्दा उनीहरुको करेन्ट लागेर मृत्यु भएको प्रहरी नायव उपरीक्षक मल्लले जानकारी दिएका छन् । 

मल्लले भनु,‘दिउँसोको समयमा एक्कली हाइटेन्सन लाइनको तार चुडिएर घरको आँगनमा खसेको रहेछ, त्यही तारमा पर्दा एकै घरका तीन जनाको मृत्यु हुन पुगेको छ।’