कला

शान्ति सापकोटाको 'मङ्की माइन्ड' कथा सङ्ग्रह लोकार्पण

• माधव घिमिरे \'अटल\' 
• २७ कार्तिक सोमबार, २०८० | १६:१४:०० मा प्रकाशित

काठमाडौं । साहित्यकार शान्ति सापकोटाको कथा सङ्ग्रह 'मङ्की माइन्ड' सार्वजनिक भएकाे छ । शनिवार प्राज्ञ डा. कौशिला रिसाल कथा सङ्ग्रहकाे लाेकार्पण गर्दै कथाहरूमा किशोर मनोविज्ञान राम्ररी केलाइएको बताउँदै पात्रहरूले अन्जानमै गरेका खराब कर्मप्रति पश्चाताप गर्दै आफूलाई सुधारेको पक्ष निकै सबल भएको टिप्पणी गरिन् । 

समस्याग्रस्त वयलाई व्यवस्थापन गरी कसरी सकारात्मक र सुधारात्मक बाटोमा लैजाने भनि आत्मविश्वास जगाउन सक्नु कृतिको सशक्त पाटाे भएको उनको विचार थियो । सर्वज्ञताको भ्रान्तीलाई किशोरहरूले थाहा नपाउने गरी चिरेर कसरी स्वावलम्बी नागरिक बनाउने भन्ने सवाल नै आजको साझा चुनौती भएको बताइन् । उनले नेपाल प्रज्ञा प्रतिष्ठानले बाल वाङ्मय तथा अनुसन्धान केन्द्रसँग सहकार्य गर्न चाहेको पनि प्रस्ट्याइन् ।

ललितकला प्रज्ञा प्रतिष्ठानका पूर्व कुलपति के.के. कर्माचार्यले शीर्षक अत्यन्तै सान्दर्भिक भएको चर्चा गर्दै किशोर समस्या र मुद्दा घरघरमा भएको भनाइ राखे । उनीहरूको मोबाइल आतङ्क, युट्युब आतङ्क तथा गुगल आतङ्कबाट सिङ्गो परिवार नै प्रताडित हुनुपरेको कर्माचार्यको कथन थियो ।

टिप्पणीकार तथा सर्जक केशरी अम्गाईले औँलामा गन्न सकिने कथाकारले मात्र किशोर कथा लेखनमा आँट गरेको भन्दै शान्ति सापकोटाले उठाएको जोखिमको हार्दिक सराहनीय रहेका बताइन् । संसारभरका किशोर कथाका दृष्टान्त पेस गर्दै उनले किशोर कथा लेखनी गर्दा विषय विविधतालाई शिरोधार्य गर्नुपर्ने दाबी गर्दै किशोरका रूची, समस्या र मनोविज्ञानको सही पहिचान गरेर मात्र कथा लेख्न कथाकारलाई सुझाए । विद्रोह चेत र आशावादिता नै यो कृतिको सामर्थ्य हो भन्ने अभिमत राख्दै कथा सङ्ग्रहमा प्रेमको पाटोबाहेक अन्य ओझेल परेको आफूलाई भान भएको जिकिर गरे। कथाकार शान्ति सापकोटाले रचनागर्भ, समाविष्ट कथाहरू र प्रकाशनका सिलसिलामा आएका अप्ठ्याराबारे आफ्नो भनाइ राखिन् ।

बाल टिप्पणीकार तपस्या वाग्लेले कृतिको साङ्गोपाङ्ग शल्यक्रिया गर्दै आफ्नै शिक्षक वा अभिभावकबाट असुरक्षित बालबालिकाले विभेद र दुर्व्यवहार विरुद्ध लड्नुपर्छ भन्ने सन्देश बोकेका कथाको खुलेर प्रशंसा गरिन् । जातभातले निम्त्याएको सामाजिक घाउ कति चहर्याइरहेछ भन्ने कथाहरूमा पनि त्यसविरूद्ध सङ्घर्ष गर्नुपर्ने आह्वान प्रशंसनीय भएको भनाइ राखिन् । कृति पढ्दा थप पढ्न मन लाग्ने भएको जिकिर गर्दै कान नछामीकनै कागको पछि लाग्ने यथार्थताको दर्पण नै कथासङ्ग्रह भएको निर्क्यौल निकाल्दै हाम्रो मौजुदा समाजविरुद्ध तिखो व्यङ्ग्य कसिन् ।

डा. तारानिधि भट्टराईले आगन्तुक अभ्यागतहरूलाई स्वागत गरेको सो कार्यक्रममा मञ्जु ज्ञवालीले धन्यवाद ज्ञापन गरेकी थिइन् । नाट्यकर्मी तथा साहित्यकार केदार श्रेष्ठले सहजीकरण गरेको सो कार्यक्रमलाई केन्द्रका अध्यक्ष तथा कार्यक्रमका समेत अध्यक्षता ग्रहण गरेका अनन्त वाग्लेले शान्ति सापकोटाको लेखनीको प्रसंसनीय रहेकाे बताए ।