राजनीति

उपराष्ट्रपतिका उमेदवार रामसहाय यादवविरुद्ध एमालेले हाल्याे उजुरी

• गाउँ सहर संवाददाता
• २७ फाल्गुण शनिबार, २०७९ | १८:४४:०० मा प्रकाशित

काठमाडौं । नेकपा एमालेले जनता समाजवादी पार्टी नेपालका तर्फबाट उपराष्ट्रपति पदका उमेदवार रामसहाय यादवविरूद्व उजुरी दिएको छ । निर्वाचन आयोगमा एमालेले यादवको उमेदवारीविरुद्ध उजुरी दिएको हो । 

राष्ट्रपति पदमा पुरुष उमेदवार निर्वाचित भइसकेको अवस्थामा उपराष्ट्रपति पदमा महिला उमेदवार हुनु पर्ने संवैधानिक प्रावधान रहेको भन्दै एमालेले उजुरी दिएको हो । 

शनिबार दिउँसो सङ्घीय संसद् भवन नयाँ बानेश्वरस्थित राष्ट्रपति तथा उपराष्ट्रपति निर्वाचन कार्यालयमा नेकपा (एमाले)का सांसद महेश बर्तौलाले यादवविरुद्ध उजुरी दिएका हुन् ।

राष्ट्रपतिमा पुरुष निर्वाचित भइसकेकाले उपराष्ट्रपति पनि पुरुष हुन नहुने भन्दै एमालेका सांसद बर्तौलाले जसपाका उम्मेदवारविरुद्ध उजुरी दिएका हुन् ।

निर्वाचन अधिकृतको कार्यालयले ६ बजेसम्म दाबी विरोधको सूचना दिने समय दिएको छ । उजुरीमाथि भोलि (आइतबार) १२ बजेसम्म छानबिन गर्ने समय छ ।