रुपन्देही क्षेत्र नं. २ मा मतगणना अवरुद्ध, उल्लेख गरिएभन्दा बढी मतपत्र भेटियाे

राजनीति

रुपन्देही क्षेत्र नं. २ मा मतगणना अवरुद्ध, उल्लेख गरिएभन्दा बढी मतपत्र भेटियाे

गाउँ सहर संवाददाता
९ मङ्सिर शुक्रबार, २०७९ | १५:१४:०० मा प्रकाशित

बुटवल । रुपन्देही प्रतिनिधिसभा निर्वाचन क्षेत्र नम्बर २ मा मतगणना अवरुद्ध भएको छ । गणना अन्तिमतिर आइपुगेको बेला मुचुल्कामा उल्लेख गरिएको मतपत्रको संख्याभन्दा गणनामा बढी मतपत्र भेटिएपछि मतगणना रोकिएको हो । सत्ता गठबन्धन र राष्ट्रिय स्वतन्त्र पार्टीका प्रतिनिधिहरुले पुनः मतदानको माग गर्दै विरोध गरेपछि मतगणना स्थगित गरिएको छ ।

८१ हजार मतमध्ये ६ हजार मत गन्न बाँकी छँदा मतगणना अवरुद्ध भएको हो । सत्ता गठबन्धनमा आवद्ध दल र राष्ट्रिय स्वतन्त्र पार्टीले पुनः मतदानको माग गर्दै निर्वाचन अधिकृतलाई ज्ञापनपत्र समेत बुझाएका छन् । मुचुल्कामा लेखिएको मतपत्रको संख्याभन्दा केही फरक परेपनि महिला र पुरुषको मतपत्र भिडाउँदा मतपत्रको संख्या बढी नभएको निर्वाचन अधिकृत उद्वीर नेपालीले बताए ।

उनका अनुसार लुम्बिनी वाणिज्य क्याम्पस ‘ड’ बुथमा ३८८ जना महिला र पुरुष २४१ गरी ६२९ मत खसेको मुचुल्कामा उल्लेख भएको तर उक्त तथ्यांकलाई निर्वाचन कार्यालयको कम्युटरमा प्रविष्ट गर्ने समयमा महिलाको संख्या फरक पर्न गएको हो । कम्प्युटरमा प्रविष्ट गर्ने समयमा मानवीय त्रुटीका कारण फरक संख्या उल्लेख हुन गएको स्वीकार गर्दै मतपेटिकामा भएको र मुचुल्कामा भएको संख्या नै सही भएको निर्वाचन अधिकृत नेपालीको दाबी छ ।

मतगणना अवरुद्ध हुनुअघि रुपन्देही २ मा नेकपा एमालेका उम्मेदवार विष्णु पौडेल एक हजार बढी मतले अग्रता लिएका थिए । दोस्रो स्थानमा राष्ट्रिय स्वतन्त्र पार्टीका गणेश पौडेल र तेस्रो स्थानमा सत्ता गठबन्धन समर्थन पाएका राष्ट्रिय जनमुक्ति पार्टीका केशवबहादुर थापा तेस्रो स्थानमा छन् ।